Aizawl FC-in Rajasthan United mikhual dawn

Mizo I League club Aizawl FC chuan zanin dar 7:00 hian match khelh tur an nei dawn a, Rajiv Gandhi Stadium, Mualpuiah Rajasthan United an hmachhawn dawn - coach thar Bobi Stojkoski hnuaia chak la nei lo Mizo club tan insiamṭhat hun a ni.

Aizawl FC hian Dutch manager Erol Akbay hoin bul an ṭan a, mahse, match khat chauh a enkawl hnuah a bansan leh avangin Mizo coach B. Malsawmzuala chuan coach lailawk hna a chelh - Mizo coach hnuaiah result nei ṭha mah se, Sawmtea tan season tluana enkawl theih a ni lo a, North Macedonian coach Bobi an la lut.

Mahse, Mizo club hian Bobi hnuaiah match thum khelin point khat chiah an la hlawh chhuak a, an match hnuhnung berah phei chuan Sreenidi Deccan lakah 5-1 ngawtin an tlawm - an mualpho takzet.

Hmarchhak aṭanga I League champion hmasa ber Aizawl FC-in zaninah insiamṭhatna hun remchang mahni mualah ngei an nei dawn a, Rajasthan lakah point thum aia hniama lungawi tur an ni lo - an mikhual club hian Malsawmzuala Tlangte, Lalchungnunga Chhangte, Lalhunmawia Chhakchhuak, HP Lalremruata, Vanlalzahawma, Lalbiakzuala leh Sairuatkima te chu Mizo player an kawl an ni.