Group B-ah chak an awm lo

FIFA Santosh Trophy 2024 final round-ah nimin khan group B an inkhel a, match hmasa pahnihah chak an awm lo. Delhi leh Karnataka 1-1 in an inhnehtawk a, Railways-in Manipur 1-1 thoin an chelh bawk. Nizan khan Mizoram leh Maharashtra an inkhel a, result kan hre hman lo.

Delhi-in Karnataka lakah inbuatsaihna an nei ṭha tih an lantir a, rang takin ball an inpe kual. Amaherawhchu champion team danglamna a lang a, minute 23-naah Appu Swamy-a'n box pawn aṭangin goal kilah ṭha zetin a pet lut a, Karnataka-in goal an khung hmasa zawk.

Goal an khung hnuah Karnataka an fimkhur tawk lo a, goalkeeper Christuragan-a'n cross ball satliah a man ṭhelh avangin defender Prabin Tigga-a'n an lamah a tilut. First half-ah 1-1 a ni a, second half injury time-ah Delhi-in chakna hun ṭha an nei.

Delhi penalty hmuh chu an player zinga naupang ber Sridarth Nongmeikapam-a'n petin goalkeeper Christurajan-a'n a tihsual siam ṭhat nan hmangin ṭha takin a dang. Inkhel a tawp zui a, 1-1 in inkhel a tawp.

Manipurin Railways lakah inkhel an thunun zawk a, first half-ah goal a lut lo. Minute 56-naah Samson-a ball vawrhluh chu Phijam Sanathoi Meetei-a'n vawi khatah pet nghalin hmahruaina goal a khung.

Manipur goal bawh a na a, mahse goal dang an khung thei lo - Delhi ang thoin Manipurin penalty an hlah. Injury time-ah Railways tan Akash Babu-a'n siphurh a sut a, Manipur tan insiamṭhatna hun a awm tawh lo. Team pahnih 1-1 in an inhnehtawk.