Shaw a chawl rih dawn

Manchester United defender Luke Shaw chu a tihrawl hliam vangin a chawlh rih a ngai dawn a, nipui laia neih tur Euro 2024 atan pawh a dinhmun a chiang ta lo a ni.

Kum 28 mi Shaw hi kar tawpa Manchester United leh Luton Town ten an inkhelh ṭumin a inhliam a, chawlhlawk hman a nih hmain thlak a ngai. A hliam endik a nih hnuah thla khat aia rei a chawlh a ngai dawn tih a chiang.

Man United chuan thuchhuah siamin, "Luke Shaw chu tihrawl hliam vangin a chawlh rih a ngai dawn, a chawlh chen tur tak hi chiang taka sawi theih la ni lo mah se thla eng emaw tichhung chu a inkhel thei dawn lo," an ti.

Erik ten Hag-a'n left back chhawr tur pangngai tak a nei lo. Shaw bakah hian Tyrell Malacia chu a inkhel thei lo mek, loan hmanga an hawh Sergio Reguilon chu an lo chhuahtir tawh bawk a ni.

Man United hian tun kartawpah Premier League khel turin Fulham an mikhual dawn, tlarhnung sir lamah Victor Lindelof chu a inlan mai a ngaih a rinawm.