Ṭantu nei ṭha Mizoram chak lo nghal : Vawiinah chawhma dar 10-ah Mizoram Vs Karnataka

FIFA Santosh Trophy Final Round-ah Mizoramin thlawptu an nei ṭha a, amaherawhchu anmahni ṭantute lawmna an siam thei lo. Mizoram hian match hmasa berah Maharashtra 3-1 in an hneh lo a, group B-a chak lo awmchhun an ni.

Mizoram hian vawiin chawhma dar 10:00 hian champion lai Karnataka an hmachhawn dawn a, hmabak a harsa dawn hle. Group khatah team paruk awmin a sang paliin quarterfinal an lut dawn a, inelna hi National Games khel tur zawnna a nih tel bawk avangin Mizoram tan chak a pawimawh takzet.

Beisei pha lo

Mizoramin champion beiseina sang tak nen Itanagar an pan a, match hmasa ber an khelh dan aṭanga thlir chuan champion chu sawi loh, knockout stage khelh phak pawh a har dawn. Mizoram khingpui Maharashtra hi qualifying round-ah an che ṭha a, final round-ah pawh bul an ṭan ṭha.

Maharashtra hian chance insiam thei lo mah se ṭan phat aṭangin inkhelah an chungnung zawk a, Mizoram an bet zawk. Coach Lalsangzuala Hmar kaihhruai Mizoram an khel ṭha tawk lo a, chutihrualin training ground-a an zir ang thlap tih theih tura mawiin chiang zetin Maharashtra tlarhnung an ṭhiat. Bawngkawn forward MS Dawngliana ball fing chu Vanlalbiaa Chhangte-in a um lut a, Hriangtlang tlangval hian keeper chauh hmachhawn hman mah se Maharashtra defender-in a tibuai hman.

Mizoram game a ṭha chho hret a, mahse an freekick hlawhchhuah chu Maharashtra-in vuaklet nan an hmang. Advait-a'n mual vei lamah ball um lutin goal lamah a la a, Mizoram defender Lalhmunmawia'n (Ahmuntea) veng mah se Maharashtra midfielder hian mawi zetin minute 26-naah a hlai lut.

Second half-ah Mizoramin insiamṭhat tumin R. Malsawmtluanga an luhtir nghal a, ball pawh an chang tam ta zawk. Mahse, minute 77-naah throw in-ah Lalruatfela leh Lalrinchhana Tochhawng te an chesual a, Maharashtra-in hmun hlauhawm laia ball chhuhsakin Ahmuntea'n 'own goal' a neih phah.

Goal duhin Mizoramin Lalthankima leh MC Malsawmzuala te an luhtir a, hemi hma hian HP Lalremruata leh Sawma Tlangte te an lut bawk. Minute 80-naah HP-a ball fing chu Thathana'n um lutin a cross-shot chu MC-a'n goal-ah a khung a, goal luhna tura inrawlh player pathum hi bench aṭanga lut vek an ni.

Mizoramin beiseina thar an nei a, Thathana'n senior team tana a khelh hmasak berah goal khung theihna hun ṭha a bawhpelh. Injury time-ah erawh Mizoramin goal khung tuma an nawr luat an tuar a, counter attack aṭangin Dipak Patil-a'n a khung. Maharashtra goal hnuhnung pahnih hi Mizoram team tihsual liau liau tiin a sawi theih.

Chhuanlam tur a awm lo

Mizoramin beisei an phak lo chungin Itanagar Mizo Welfare Association erawhin an thlawp ṭha hle. Stadium chhunga thawm nei tham Mizo kawr sen hain an pungkhawm a, an thawm ring ṭha tak avangin hun tawp thlengin Mizoramin beiseina sang tak an neih phah.

Inkhelhna hmun Golden Jubilee Stadium hi artificial turf phah thar a ni a, artificial turf-a khel ṭhin Mizo player-te tan chuan duhthusam a ni. Mizo tan inkhelhna hmun a ṭha a, ṭantu an neih ṭhat bawk avangin match hmasa bera chak loh danah chhuanlam siam thei an ni lo.

Mizoram manager K. Lalenghluna (Maenga) chuan, "Theihtawp chhuahin kan inbuatsaih a, kan beisei ang result erawh kan hlawh chhuak lo. Chutihrualin match li khelh tur kan la nei a, group khat aṭangin pali an lut dawn a, a tawp thlengin theihtawp kan chhuah dawn," tiin Vanglaini a hrilh.

Hmabak champion lai

Mizoram hian champion lai Karnataka an hmachhawn chhunzawm dawn a, Karnataka hi match hmasa berah Delhi nen an inhnehtawk. Champion lai an nih avangin Karnataka hian group stage an khel ve lo a, final round match hmasa berah Delhi nen 1-1 in an inhnehtawk.

Mizoram coach Lalsangzuala Hmar chuan, "Karnataka lakah point hlawhchhuah ngei a ngai. First match-ah training-naa kan khelh angin kan khel thei lo a, kan zir anga kan khelh theih ngei nan ngaihtuahna kan seng nasa a, kan training hun neih ang chhun kan hmang ṭha bawk," tiin Vanglaini a hrilh.

Team chungchang sawi chhun-zawmin Sanga chuan, "Player kan siksawi hret a ṭul dawn a, 3-1 a chak lo kan nih miau avangin kan thlak tam hret pawh a ṭul ang. Mizoram team-in kawng dik kan zawh theih nan Karnataka hneh hi a pawimawh a ni," tiin a sawi.