Pep-a'n ram team enkawl a chak

Manchester City manager Pep Guardiola chu a hma huna a thil tih châk an zawt a, Spanish manager hian World Cup-ah emaw European Championship leh Copa America-ah emaw team kaihhruai a châk thuin a chhang.

Kum 53 mi Pep hian City tan kum 2025 thleng daih contract a nei mek. Barcelona, Bayern Munich leh Citizens tan nomawi chawi theih hrang hrang a chawi hnem tawh a, a tan chona dang hmachhawn pawh a châkawm a rinawm.

Club lama nomawi 37 chawi tawhtu Guardiola chuan, "World Cup, Euro leh Copa te hi a boruak tem ve chhin chu ka châk, eng ang tak nge a nih hi tawn ve phawt loh chuan a hriat theih loh. Mahse, ka duh ringawt a tawk lo, eng ramin nge min ruai duh ang tih a pawimawh.

"Ka duh thu sawi mah ila hetiang hi engtik huna lo thleng tur nge tih pawh hriat a la ni lo bawk," a ti. Tun dinhmunah chuan Pep hian Manchester City bak ngaihtuah a neih theih loh thu a sawi bawk.

Pep-a enkawl Man City hian EPL, FA Cup leh Champions League nomawi an kawl khawm mek, tun season-ah humhim thei dinhmunah an la ding vek bawk. Zanin dar 11:00 hian Bournemouth nen league match an khel ang.