United striker Hojlund a inhliam

Manchester United-in chanchin lawmawm lo hriat tur an nei a, striker Rasmus Hojlund chuan a tihrawlah hliam a nei a, kar hnih aṭanga kar thum vel tal chu a chawlh a ngai dawn - United hian zanin dar 8:30-ah Fulham chu league match khel turin an mikhual dawn a, Danish striker hi a inlan thei dawn lo tihna a ni.

Hei chauh a ni lo - Nilaini zana Nottingham Forest nena FA Cup fifth round an khelh tur leh, March 3 zana Manchester City an lenchilh turah pawh a inlan thei dawn lo tihna a ni a, United tan chuan chânna nasa tak a ni, tih loh rual a ni lo.

Pound maktaduai 72 man Hojlund hian a match hmasa lamah United tan beisei a phak lo a, Premier League-a match 14 a khelh hmasakah goal a khung miah lo! Mahse, tunah erawh European football-a striker langsar ber pawl niin, a league match hnuhnung parukah goal sarih khungin, assist vawi hnih a nei.

Kum 21 mi striker hi Premier League-a match ruk chhung a zawna goal khung thei naupang ber a ni a, tun season-ah United tan inelna hrang hrangah match 30 khelin goal 13 a khung tawh.

United-a Hojlund tih loha 'striker' tia chhal theih dang chu Anthony Martial a ni a, mahse, French striker pawh hi a ṭhal hliam zai a nih avangin a lo berah April thleng chu a inlan thei dawn lo.

United hian kar hmasa Pathianni khan Luton Town chu 2-1 in an hneh a, league match li chhung a zawna an chakna chiah niin, Champions League beiseina pawh an nei thar. Mahse, an phur vanglai takin striker chhuanvawr a inhliam leh si.