Arsenal lakah Magpies an fimkhur dawn

Zanin dar 1:30 hian Arsenal chuan Premier League khel turin Newcastle United an lo mikhual dawn - Magpies manager Eddie Howe chuan fimkhur leh a ṭha thei ang bera an khelh a ngaih tur thu a sawi.

EPL match an khelh hnuhnung pangaa chak vek Newcastle manager Howe chuan, "Season hmasa Emirates Stadium kan lenluh boruak kha kan la hre reng, tun ṭumah pawh hian inkhel hautak a ni dawn - point hmu tur chuan a ṭha thei anga bera kan khelh a ngai dawn.

"Statistics kan en chuan Arsenal hi EPL club ṭha berte zinga mi an ni tih kan hria, chuvangin kan tan chuan anni hmachhawn hi chona a ni dawn a, player zawng zawngin an hna ṭheuh tlin taka an thawh a ngai ang," a ti.

Kar laihawlah Gunners hian Champions League an khel a, an zinchhuahna ramah Porto an ngam lo. Howe chuan, "Keini pawhin Champions League kan lo khel ve tawh a, an boruak tur chu tlem a zawng kan hrethiam.

"Inkhel zawng zawng hi a pawimawh vek tih kan hria. Chuvangin Porto an hneh loh khan Arsenal hi a nghawng ka ring lo a, a hma aia ṭha leh hlauhawm zawka khelh an tum ngei bawk ang," a ti.

Arsenal hian thlasik chawlh an hmang ṭha hle a, goal khung nuam an tiin goal an venghim ṭha thei hle. Premier League lamah kaltluang viau mah se UCL-ah an lo chelh zauh a, zanin hian insiamṭhat leh nghal an tum ang.

Newcastle hian tun hnai khan sporting director Dan Ashworth chu Manchester United lakah an chân. Magpies manager Eddie Howe chuan, "Eng emaw laiah chuan nghawng a la nei mai thei, player leh kan khelh danah erawh nghawng nei lo se ka duh," a ti.