Germany tan Kroos inlan leh dawn

Real Madrid midfielder Toni Kroos chuan an ram tan football a khel leh dawn. Euro 2024 an khelh hunah Kroos hian Germany jersey a ha leh dawn tihna a ni, coach Julian Nagelsmann nen an inbiak hnuah thutlukna hi a siam.

Kum 34 mi Kroos hian tawnhriat a ngah tawh, World Cup 2014 khan an ram chu a lo champion pui tawh. Die Mannschaft tan match 106 a khel hman a, kum 2021 July thla khan ram tana inkhelh a chawlhsan.

A kir leh tur thu sawiin Kroos chuan, "Germany tan March thla aṭangin ka inkhel leh ang, a chhan min zawt a nih chuan coach-in inkhel tura min ngen vang a ni, min ngenna hi ka chhang," tiin a sawi.

Ram tan mai bakah club lamah tawnhriat a nei hnem. Bundesliga leh La Liga nomawi pawh vawi thum ve ve a chawi tawh a, hei mai bakah hian Champions League nomawi vawi nga a chawi tawh.

Germany hian Euro 2024 an thleng dawn, an beisei angin inbuatsaihna lamah an che ṭha tawk lo. March thla hian France leh Netherlands te chu friendly match an khelhpui dawn, he hunah huan Kroos hi a inlan ṭan ang.

Euro 2024 hi June thlaah an khelh dawn - a thlengtu Germany hian an match hmasa ber atan June 14, Zirtawpni hian Allianz Arena-ah Scotland an hmachhawn dawn a ni.