Chelsea vs Liverpool: Pathianni zanah champion a hriat dawn

Premier League-ah ringawt pawh nomawi chawi thei khawpa team ṭha paruk vel an awm tawh a, tun hmaa 'Big Four' kan tih ṭhin khan tunah chuan 'Big Six' tih a ṭul tawh - hei hian inelna hautakzia a pholang a, English club-ten eng inelna pawh an ngaihnep a thiang ta lo.

Hei vang tak hian League Cup pawh tun hma zawng aiin a hlu tawh zawk tiin a sawi theih a, Pathianni zan dar 8:30 hian final hmuhnawm en tur a awm dawn - Liverpool leh Chelsea an intawng dawn a, inkhel hi he thu buatsaih lai hian India-ah chuan television-a pekchhuahna tur sawi a la awm lo a, FanCode website leh app-ah online-in a en theih thung.

Chelsea-in coach Mauricio Pochettino hnuaiah indinthar hna an thawk mek a, Argentine coach hian, "Champion châkin kan tuihal a ni," tiin a sawi a, zaninah an theihna zawng zawng nen champion tumin an khel ang.

Liverpool thawnthu a danglam lo. Season tawp rualin an coach ropui Jurgen Klopp-a'n a chhuahsan dawn a, inelna pali Premier League, FA Cup, League Cup leh Europa League-ah champion theih an la beisei vek - nomawi pali nen an coach thlah an duh a, zanin hi a bul ṭan nan hman an tum dawn.

Hliam a tam

Tun season-a Premier League mai ni lo, European football-a team hmuhnawm ber pawl chu Liverpool an ni a, mahse, he team hi tun hnaiah hliam vangin an buai - an league match hnuhnung bera 4-1 a Luton Town an sawp khan hliam vanga inlan thei lo senior player chu pakua an ni!

Jurgen Klopp-a'n dam lam pan tia a sawi pathum Dominik Szoboszlai, Darwin Nunez leh Mohamed Salah te he thu buatsaih thleng hian an dinhmun a la chiang lo a, Reds hian chhawr theih ngei tumin vawiinah an hliam hi an en dik leh ang.

English midfielder Curtis Jones chu a inlan thei dawn lo chiang a, right back Trent Alexander-Arnold pawh March thla chhungin a lo kir hman ang em, sawi chian theih a ni lo. Salah awm loh hlana goal khungtu ber Diogo Jota chu thla khat aia tam a chawl dawn bawk.

Salah leh Nunez an inlan thei lo a nih chuan Cody Gakpo leh Luis Diaz ten mawhphurhna an lak thiam a ṭul dawn a, midfield-ah Alexis Mac Allister a pawimawh lehzual dawn a, Wataru Endo leh Ryan Gravenberch ten an hna an thawh ṭhat bawk chuan Chelsea tan a harsa ang.

Hlimna thlentu

Nizan khan Liverpool-in Chelsea nena an inkhel tur thlirlawkin press conference an nei a, mahse, coach Jurgen Klopp aiah assistant coach Pep Lijnders-a'n media a hmachhawn a, German coach hian final boruak sang khelh hmaa media hmaa inpholan ṭul a tirih lo niin a lang.

Lijnders chuan, "Final ṭha tak khel tur chuan kan khingpuite kan zuam loh a pawimawh ber a, tlarhnung lam kan fimkhur a ṭul bawk. Kan tum ber chu fan-te hlimna thlentu nih a ni a, kan duh ber hi kan sawifiah dawn a nih chuan, fan-te hlimna thlen a, an thinlung hneh hi a ni," a ti a, Pathianni zanah chak a tum.

Reds Assistant Coach hian sawi zawmin, "Liverpool FC hi nomawi chawi tura duan kan ni a, kum tinin nil lo tura kan beih ziah a ṭul. Chu chu kan rilruah a riak reng tur a ni a, tun ṭumah pawh hei hi tihhlawhtlin kan tum ang," a ti a, nomawi chawi a tumruh hle.

Liverpool tan goalkeeper inhliam Alisson aiah Caoimhín Kelleher chu si ban nghak tura ngaih a ni a, Virgil van Dijk leh Luton laka hahdamtir Ibrahima Konate khelh ṭhat a ṭul a, Andrew Robertson bakah Arnold awm loh laia hming chher Conor Bradley an pawimawh bawk.

Chelsea beiseina

Blues-in coach Pochettino hnuaiah tluk leh din an fawm a ni ber a, Premier League-ah beisei an phak loh avangin an hmingchhiatna thaibo turin nomawi chawi an mamawh lehzual - League Cup leh FA Cup chu tun season-a champion an la beisei theihna a ni.

Tun season Premier League-a team pahnih intawn hmasakah 1-1 in an inhnehtawk a, Anfield-ah erawh 4-1 ngawtin Reds an chak. Liverpool laka an tlawm hnu hian Wolverhampton Wanderers chu 4-2 in an ngam lo bawk a, Poch-a naute an mualpho hle.

Mahse, London club hi an insiamṭha mek - Reds leh Wolves an ngam loh hnuah team ṭha Aston Villa chu FA Cup-ah 3-1 in an hneh a, league-ah 3-1 vekin Crystal Palace an sawp zui a, champion tum Manchester City chu khualmualah 1-1 in an chelh thei bawk.

Chelsea tan Thiago Silva chu khel bawr hliam vangin a inlan theih dawn leh dawn loh a chiang lo a, tawnhriat nei ṭha defender-in a ho theih leh theih loh hian an team dinhmun tur a hril dawn.

Engtin?

Blues hian 4-2-3-1 formation hmangin Liverpool an hmachhawn tura ngaih a ni a, Djordje Petrovic-a'n si ban nghakin, Ben Chilwell, Axel Disasi leh Malo Gusto te chu bul ṭan chiang tura beisei an ni a, Silva a dam hman loh chuan Levi Colwill a luh a rinawm.

Pound maktaduai 100 man Moisés Caicedo-a'n heti zat zet Chelsea-in an sen ngam chhan a la tarlang thei lo a, Blues a thlan avanga a hnawl tak Liverpool lakah a theihna tak tak pholan a châk ang.

Caicedo hi Enzo Fernandez nen inkawp leh tura ngaih a ni a, mual ding lam sirah Cole Palmer a awm ang - ani hi tun season inelna hrang hranga match 32 a khelha goal 14 leh assist vawi kua neitu a ni a, a laiah Conor Gallagher awmin, vei lamah Raheem Sterling a awm thei ang.

Chelsea tana a 'ṭhelhtupa' tih hial khawpa mawi Nicolas Jackson hian tlarhma a rawn luah ang em, sawi thiam a harsa a, Christopher Nkunku hliam dam tawh mah se final meuha bul ṭan tur chuan Poch-a'n rin a harsat mai thei.