Alonso-a'n thuthar a nei lo

Bayer Leverkusen boss Xabi Alonso chuan a club hlui Bayern Munich leh Liverpool nen sawizawm ni mah se, amah lam aṭang chuan engmah thuthar a awm loh thu a sawi a, Spanish coach chuan, "Ka hma hun inhre duh a ni mai thei a, mahse, engmah sawi tur ka nei lo tih ka sawi lawk duh.

"Tunah chuan Leverkusen coach ka ni a, ka hma hun atana sawi theih erawh ka nei lo. Kan la hre zel ang chu," a ti. Alonso hian Leverkusen chu Bundesliga-ah hma a hruaipui mek a, anmahni hnaih bertu Bayern Munich aiin point riatin an sang zawk mek.

Nizan khan Mainz an lenchilh a, he thu buatsaih a nih lai hian result kan hre hman lo. Alonso nena sawizawm Liverpool hi season tawp rualin coach Jurgen Klopp nen an inṭhen dawn a, Bayern pawh coach Thomas Tuchel nen season tawpah an inthlah dawn tih a chiang tawh.