Services an chak nawn

FIFA Santosh Trophy final round-ah Services-in team ṭha an ni tih lantirin nimin khan Arunachal Pradesh 4-0 in an sawp a, match hnih khelha vawi hnih an chak avangin final round lut turin an dinhmun a ṭha hle. Inkhel dangah Assam-in nikum finalist Meghalaya 2-1 in an hneh thung.

Services tan Mizo tlangval Zothanpuia'n bul a ṭan leh a, Thangpuia telna Services tlarhnung a phui bakah goal khung an awlsam. First half-ah Services tan Samir Murmu leh Vijay ten a khung a, second half-ah Bikash Thapa-a'n goal hnih khungin inelna thlengtu Arunachal Pradesh-in a chhanletna an nei lo.

Services hi champion tura rinkai ni phak an ni a, final round-ah pawh champion zia an la chhuah zel. Arunachal Pradesh erawh inelna thlengtu an nih avanga final round khel an ni a, Goa lakah huaisen takin point khat hlu tak hlawh chhuak mah se Services lakah erawh ṭang tur an awm lo.

Nimin tlai inkhelah match hmasa bera chak lo pahnih Assam leh Meghalaya te an inkhel a, Assam an dingchang zawk. Meghalaya goalkeeper Lionel Rymmei-a'n Assam captain Milan Basumatary a pet per a, hemi per let hi goal-ah a lut.

Meghalaya-in an tihsual siam ṭhat nan freekick an hmang ṭangkai a, box pawn chiaha an freekick hmuh chu Sheen Stevenson Sohktung-a'n a khung. Mahse, Assam-in first half tawp hma chiahin hma an hruai nawn a, corner kick aṭanga ball kal zel chu Joydeep Gogoi-a'n kawh zetin goal kilah a volley lut.

Assam goalkeeper Birkhang Daimary-a'n box pawnah a kutin ball a khawih a, referee-in a hnawtchhuak. Meghalaya-in player 10-a khel Assam lakah inkhel an thunun a, goal chance pawh nei mah se goal ber an khung thei lo. Meghalaya hian match hnihah chak an la neih loh avangin knockout stage lut lo thei dinhmunah an ding.

February 25, Pathianni hian group B team te hi an inlan lehnghal dawn. Goa Vs Services (10:00 AM), Kerala Vs Meghalaya (2:30 PM) leh Arunachal Pradesh vs Assam (7:00 PM) inkhel a awm dawn a, inkhel pawimawh vek a la ni.