Bernabeu-a kir tur Ramos

Real Madrid legend Sergio Ramos chu Pathianni zan hian Santiago Bernabeu-ah a kir dawn a, mahse, Sevilla jersey ha chungin a ni thung - team pahnih hi Pathianni zan dar 1:30-ah league match khel turin an intawng dawn a ni.

Sevilla defender Sergio Ramos chuan a club hlui lakah goal a khung a nih pawhin a lawm loh tur thu sawiin, "Madrid mipui leh fan te ka zah em em a ni. Goal ka khung a nih pawhin ka lawm dawn dawn lo a, ka team ka chakpui a nih erawh chuan rilru a hlim ve khawp ang," a ti.

Nikum September-a Sevilla zawmtu Ramos hian Real tana a khelh lai khan La Liga nomawi panga bakah Champions League nomawi pali a chawi a, match 671-ah inlansakin, Real tana inlan tam palina a ni phak.

Mahse, Real tana a season tawp berah khan Bernabeu chei ṭhat a nih avangin Estadio Alfredo di Stefano-ah an inkhel a, Ramos chuan, "Mahni ina haw leh ang mai ka ni dawn a ni," tiin a club hlui nena an inkhel tur chu a sawi.