Europa League: AC Milan tlawm mah se an tlang

European football-a club inelna sang ber dawttu Europa League knockout round play off second leg-ah AC Milan chuan 3-2 in Stade Rennais ngam lo mah se, first leg-ah 3-0 a an lo chak tawh rah sengin, inkhel pahnih belhkhawmah 5-3 in an chak - round of 16 an lut.

French club Rennais tan Benjamin Bourigeaud chuan hattrick siam mah se, first leg-a an goal chhuah hnem an tuar a, ui tak chungin European football an mangṭha a ṭul.

Milan ang thoin AS Roma pawh an chak zo lo a, an mikhual Feyenoord nen 1-1 in an inhnehtawk. Inkhel hmasa nena belhkhawm pawhin 2-2 tho a ni a, penalty hmanga chinfel zui niin Roma an vannei.

Italian club hian penalty-ah 4-2 in hnehna an chang a, Europa League round of 16 khel turin an inpetkai. Nimin tlai khan last 16 draw neih nghal a ni a, Liverpool chuan Czech club ṭha Sparta Prague an hmachhawn ang.

Tlawm mah se...

"A tlawm lai hmel kha a mawi lai ber..." tih hla ang mai a ni a, Milan tlawm mah se an tlang tlat. Rennes-in chak ngei tumin Milan lakah goal an khung hma a, Bourigeaud chuan minute 11-na lekah goal hmahruai a khung.

Milan tan Luka Jovic chuan si phurh sut mah se, French club tan Bourigeaud chuan penalty hmangin hmahruaina goal a khung nawn. Mahse, Serie A club an awm mai mai bik lo a, Rafael Leao chuan si phurh sut ve lehin, 3-3 a ni.

Rennes hian penalty an hmu nawn a, midfielder Bourigeaud chuan hattrick siam nan a hmang. Mahse, French club hian chak tur chuan goal thum dang an khung a la ngai cheu a, Milan an ṭan ve tlat si avangin a harsa tawh.

AC Milan boss Stefano Pioli chuan, "Hma lam pan zel turin theihna kan nei tih a lang chiang a, mahse, chutiang tur chuan tun aia goal chhuah tlem kan zir a ṭul a ni," a ti.

Roma an tlang

Dutch club ṭha Feyenoord-in minute ngana leka Santiago Gimenez goal hmangin hmahruaina goal an khung a, mahse, minute 10 hnuah Roma-in Lorenzo Pellegrini hmangin an sut zui - hun tawp thlengin goal dang a awm tawh lo.

Penalty an pet zui a, 4-2 in Roma an chak a, Jose Mourinho thlaktu Daniele De Rossi hnuaiah match sarih khel tawhin vawi khat chiah an la tlawm - vawi li chakin, vawi hnih draw an nei.

Marseille lakah Shakhtar Donetsk-in Heorhii Sudakov-a penalty hmangin goal hmahruai khung mah se, French club tan Pierre-Emerick Aubameyang, Ismaïla Sarr leh Geoffrey Kondogbia ten an chhanglet a, 3-1 in an chak - inkhel hmasa nena belhkhawmin 5-3 in an tlang.

Sparta Prague-in Angelo Preciado, Indrit Tuci, Lukas Haraslin leh Jan Kuchta te goal hmangin Galatasaray chu 4-1 ngawtin an sawp a, Turkish club-in first leg-a 3-2 a an chak an chhawr thei lo - a tawpah aggregate-ah 6-4 a chakin Sparta an tlang.