Mbappe chungchang sawi duh lotu Enrique

Paris saint Germain manager Luis Enrique chuan, tun hnaia boruak nei lian tak Kylian Mbappe chungchangah sawi tur a nei rih lo tih a sawi a, season an hman lai chu a ṭha thei ang bera khar an duh tih a sawi bawk.

Tun season tawp rualin Mbappe-a'n PSG tana a contract a hmang zo dawn, season tharah chuan Real Madrid a zawm dawn tih pawh a chiang thawkhat tawh. Khawthlang chanchinbu ho chuan Euro 2024 khelh ṭan hmain a club thar hian an tlangzarh dawn tih thlengin an ziak tawh.

Mbappe chungchang zawhna chhangin Enrique chuan, "Sawi theih ka nei lo a, tunah chuan han sawi ve tur pawh ka hre lem lo. Keima chinah chuan thil sawt tawh lo sawi hi tawp se ka duh," a ti.

A chhuak dawn tih a chian hnu Ligue 1 an khelh leh hmasak berah Mbappe hi bench lama dah a ni a, mahse khelmual a luh hnuah penalty a khung tho. Pathianni zan dar 9:35 hian Rennes an hmachhawn dawn - Mbappe a inlan ngei a rinawm.