Mumang ramah Sorana Cirstea

Sorana Cirstea chuan tennis a khelh hun chhunga a thawhlehna ropui bera ngaih a tawng, dinhmun ṭha lo zawka a din hnuah Marketa Vondrousova hnehin Dubai Tennis Championship semifinal a lut.

Ningani zan quarterfinal inkhelah Wimbledon champion lai Marketa Vondrousova-i'n bul a ṭan fuh hle a, set hmasa ber a lak bakah set hnihnaah 5-1 in hma a hruai, chak tlang ngei tur pawhin a dinhmun a ṭha hman hle.

Mahse, set hnihna tawp lam aṭangin Cirstea-i chuan thil mak a thlentir, set hnihna a lak let bakah set thumna a la zui bawk, a tawpah 2-6, 7-6 (7-1), 6-2 in a chak zawkah a ṭang daih.

Kum 33 mi Cirstea hian a khingpuiin match point a hmuh vawi ruk ngawt a inchhanhim. Romanian nula chuan, "A nihna tak sawi chuan set khat hloh bakah 5-1 ngawta hniam zawk nih kha chuan ka tan chak beiseina a awm tawh lo.

"Mahse, mak tak maiin ka bei let a, ka inkhelh tawh tawh chinah chuan ka comeback ropui ber ka tawng ta hial a ni," a ti. Semifinal-ah chuan Italian player Jasmine Paolini nen an inhmachhawn leh ang.

Inkhel dangah Iga Swiatek chuan Zheng Qinwen chu 6-3, 6-2 a hnehin semifinal a lut a, champion tura rinkai zinga mi Coco Gauff erawh Anna Kalinskaya lakah 2-6, 6-4, 6-2 a chak loin quarterfinal-ah a zinkawng a tawp ve thung a ni.