East Bengal lakah Khalid Jamil a nui!

Khalid Jamil-a'n amah duh lotu East Bengal lakah phuba a la ta a, Ningani zan khan Indian Super League inkhelah a club enkawl Jamshedpur FC chuan 2-1 in Kolkata club hi an hneh.

JRD Tata Sports Complex-a inkhelah East Bengal tan Nandhakumar Sekar chuan minute 45-naah goal hmahruai a khung a, Super Cup semifinal-a Khalid-a team lo hneh tawhtu East Bengal hian hnehna an chang leh mai dawn niin a lang hman.

Mahse, Jamshedpur-in mikhual team laka tlawm an duh bik lo. Minute 80-naah Rei Tachikawa a inlar a, Japanese midfielder hian si phurh sutna goal a khung - Men of Steel an phur sawt a, Kolkata club an nguai thung.

Hun erawh a tam tawh loh avangin Jamshedpur tan chak beisei ngam a harsa a, mahse, East Bengal ban hnu Khalid-a'n a enkawl hnuah he team hi an danglam tlat - an beidawng duh lo!

Hun pek belh a ni a, JFC-in an beidawn duh loh rah an seng. Hun pek belh minute sarihnaah Jeremy Manzorro a rawn lang a, freekick aṭangin Men of Steel chakna goal a khung - hun tam zawk hmahruaitu nia hun hmangtu Red & Gold Brigade an tlawm a, kut ruakin an haw.

Ningani zana inkhelah hian JFC tan defender PC Laldinpuia chuan inkhel bul ṭanin, Ricky Lallawmawma chu minute 66-naah luhtir a ni a, East Bengal tan Lalchungnunga chu minute 86-naah bench aṭanga luhtir a ni.

Jamshedpur-in Khalid-a hnuaiah hma an sawn zel a, Aizawl FC coach hlui hnuaia league match nga an khelh tawhah tlawm an la nei lo - vawi thum an chak a, vawi hnih draw result an nei.