UFC 246: McGregor hmaa ding tur Donald Cerrone

Pathianni zing dar 8:30-ah khawvelin Conor McGregor a hmu leh dawn a, Irish fighter rothap hian octagon chhung a rah loh reng hnuah Donald Cerrone a hmachhawn dawn. 

Thla 15 hnua a vawi khat nana inlan tur McGregor hian kum 2018 khan fight ngaihven hlawh takah Russian fighter Khabib Nurmagomedov a ngam lo a, a hnuah a inlan tawh lo. Kum 31 mi fighter chuan, "Hun duhawm tak ka tawng mek a, fight hmachhawn turin ka inpeih tawh a ni," a ti a, octagon chhung rap lo rei tawh mah se a phur hle. 

UFC 246 hi mipui 20,000 punkhawm theihna hmun T-Mobile Arena, Nevada-ah neih a ni dawn a, Pathianni zing dar 8:30-ah Sony Ten 1 leh Sony Ten 1 HD-ah te a en theih ang. 

UFC weight division hniha champion lo ni tawh McGregor chuan, "Kan tih turte hre turin a chang chuan thil tam tak kan paltlang a ngai ve bawk. Tunah chuan hnah thar ṭo thar leh ang mai kan ni. 

"Rawlthar naupang tuihal tak ka la ni reng a, ka harhvang ṭhain thahrui tharte pawh nei leh hialah ka inngai a ni. Ka hmaa ban tur thil awmte chu neih ka la châk reng a, thawnthu thar ziah ka la duh reng. "Ka hmaa ding zo an awm lo. MMA hi a nih tur ang tak nih tirtu ka ni a, he game chawisangtu ka nihzia hi octagon chhungah ka pholang leh dawn a ni," a ti. 

McGregor hian fight vawi 25-a hmachhawn tawhah vawi 21 hnehna a chang a, vawi li a tlawm. A hmachhawn tur Cerrone hi vawi 50 fight a hmachhawna vawi 36 chak thei a ni a, vawi 13 a tlawm - a fight hnuhnung pahnihah a chak

zo lo ve ve bawk. 

Nurmagomedov laka a tlawm hnu khan McGregor hian chanchin ngaihnawm tak tak a nei ve reng a, buaina siam leh fan-te phone vawm chhiatsak thlengin buaina a nei!

Mahse, Cerrone nena an in fight tur atana press a hmachhawnnaah erawh ṭum dang ang lo takin Irish fighter a che uchuak lo a, a hmachhawn tur Cerrone nen hian hlim taka nui dunin an inchibai. McGregor chuan, "Cerrone hi ka zah em em a, January 19-ah pawh zah lo taka indawrna a awm lo ang. Kan fight result tur in hre lawk duh a nih chuan 'knockout' a ni dawn thung," a ti!

Kum 2017 khan McGregor hian Floyd Mayweather hmachhawnin boxing a lo luhchilh tawh a, boxing-a kir leh a hreh loh thu a sawi tel. Irish fighter chuan, "World boxing title hlawhchhuah leh ngat chu ka tan a hlu dawn em asin, Floyd hi hmachhawnleh ka duh," tiin a sawi.