Mizoram chungah vanneihnain thla a la zar lo: Chawhma dar 10:00-ah Mizoram Vs Delhi
FIFA Santosh Trophy final round-ah Mizoramin match hnih khelhah chak hmel an la hmu lo. Inrinni chawhma khan Golden Jubilee Stadium, Yupia-ah champion lai Karnataka an hmachhawn a, 2-0 in hma hruai hman mah se an sut zawh tir avangin 2-2 in an inhnehtawk.
Vawiin chawhma dar 10:00-ah Mizoramin Delhi an hmachhawn dawn a, Delhi hian an match hnuhnung berah Railways 4-0 a an sawp avangin inrintawkna an neih san lai tak a ni ang. Chutihrualin Mizoram tan knockout stage lut turin chak a pawimawh tawh a, chak loh phei chu a thiang tawh lo.
Goal ropui pahnih
Mizoramin Maharashtra hneh loin bul an ṭan a, match hnihnaah insiamṭhat tumin starting eleven-ah pawh player pasarih ngawt an thlak. Coach Lalsangzuala Hmar hoten rilru put hmang pawh an thlak a, ṭan phat aṭangin an nawrtu zawkah an ṭang.
Mizoramin ball an vawrh tawh lo a, passing game an khelh bakah mual sir aṭangin Sawma Tlangte leh Lalthankima (Thathana) te an ṭangkai hle. Minute 13-naah Mizoramin goal an khung a, tlarhnung aṭanga ball an pass chhuah hnuah MC Malsawmzuala'n mawi zeta a 'flick' kan chu MS Dawngliana'n ṭha zetin a volley goal.
Chawhma lamah pawh Mizoramin ṭantu an la nei ṭha tho a, Itanagar-a Mizo awmte thawm a ṭha. Second half ṭantirhah Mizoram goal mawi an lantir leh a, dinglam aṭanga K. Lalruatdika (Teka) vawrhluh chu Thathana'n a chang. Rawlthar duhawm Thathana hian mual sirah Karnataka defender Prabin Tigga a sep khum a, a cross ball chu MC-a'n goal-ah a chantir nghal. Maharashtra lakah pawh khan MC-a'n Thathana siamsak tho a khung a, tun ṭuma goal hi a mawi zawk.
Goal chance a tam
Mizoram lamin goal chance an neih ang thoin Karnataka pawhin goal chance an ngah a, inkhel a nung ṭha hle. Minute 25 hnu lamah Mizoram an fimkhur tawk lo a, midfield a thawl avangin Karnataka-in chance an insiam hnem hle.
Karnataka-in freekick aṭangin a khung teuh a, Teka'n goalline aṭangin a pet chhuak. Midfielder R. Malsawmtluanga pawhin corner kick aṭanga ball kal zel chu goalline-ah ṭah zetin a dang. Mizoram goalkeeper F. Lalmuanawma a che ṭha a, Mizoram an him hram hram.
Chutihrualin Mizoram pawhin goal khung theihna chance an nei a, a bik takin Thathana ball ṭha MS-a khung loh chu a uiawm zual. Mizoramin Maharashtra an hmachhawn ṭum ang thoin assistant referee tihsual an tuar a, offside ni lo ṭum hnih thum ngawt an ham avangin goal khung ngeina tur hun ṭha an chan.
Mizoram an chesual
Santosh Trophy champion lai laka goal hnih khung hi Mizoram tan chanchin ṭha a ni a, amaherawhchu chanchin ṭha hian minute 90 a daih lo. Referee-in mual sirah Karnataka freekick a pe a, replay-a ennawn leh hnuin Vanlalbiaa Chhangte-in a khawih fuh hmain Karnataka player a tlu. Karnataka hian freekick vawi khatna hi pet fuh lo mah se referee-in a pet nawn tir leh a, minute 67-naah Prabin Tigga-a'n a su goal. Goalkeeper Muanawma'n six yard box chhunga ball kal a hnek chhuak hman lo.
Mizoram an insiamrem hmain an chesual nawn leh a, minute hnih hnuah H. Lalbiakthanga pass sual chu Karnataka lamin Mizoram chhut let nan an hmang. Mual dinglamah Vishal-a'n ball khalh lutin Karnataka player dangin an thlawp hman lo chungin Mizoram keeper Muanawma'n 'near post' lamah hmun awl a dah hnem mah mah a, Karnataka-in siphurh an sut.
Karnataka-in siphurh an sut zawh hnuah inkhel an thunun hret a, goal dang khung belhna hun remchang pawh an nei. Chutihrualin Mizoram pawhin chakna goal khung theihna hun ṭha an nei a; Dawngtea, Malsawmfela leh Mabiaa ten chance ṭha an hlah vek.
Final tenau
Mizoramin match hnihah point khat chauh an la hmuh avangin an khelh hmabak apiang hi final tenau a ni tawh. Vawiina Mizoram khingpui tur Delhi hi an khelh tawh china group B aṭanga la khel ṭha ber anga chhal theih an ni.
Delhi hian Railways lakah football passing mawi tak an lantir a; an striker Jaideep Singh bakah mual sir lama awm Sridarth leh Dhruv te an hmuhnawm viau bawk. Santosh Trophy atan Delhi hian inpuahchahna an nei ṭha a; group stage-ah pawh team ṭha West Bengal bakah Punjab leh Odisha te pe thlatu an nih avangin an tawh a khirh viau ang.
Mizoram coach Lalsangzuala Hmar chuan, "Delhi inkhel hi kan en tawh a, Karnataka nena an inkhelh ṭum pawh kan en. Hun tam zawkah khan Karnataka khan Delhi lakah inkhel an thunun zawk a, chu Karnataka team lakah chuan goal hnih kan khung hmasa thei a ni. Kan tihsual lai te kan siam ṭha zel a, Delhi lakah hian chak ngei kan tum," tiin Vanglaini a hrilh.
Karnataka lakah Mizoram hian hliam vangin Teka, MC-a leh Thathana te an la chhuak a; nimin khan Teka, Thathana leh Dawngtea te hliam vangin team training an zawm lo. Mizoram hian starting eleven an thlak hlawk a rinawm tawh lo a, chutihrualin player inhliam dinhmun a zirin starting eleven erawh an thlak hret a ṭul ang.
