Magpies laka phuba latu Arsenal

A la rei lo - nikum November thla mai kha a la ni. St James Park-ah Arsenal an lenglut a, hun tawp dawna goal khat lut vangin Gunners an chak lo, manager Mikel Arteta a lawm lo a, ṭawngkam mawi lo a hman zui phah hial a nih kha.

North London club hian Inrinni zan khan Newcastle United hi an lo mikhual ve thung a, kawng tinrenga inkhel thunun chungin 4-1 in an lo sawp - goal li chauh an khung kha Magpies an vannei zawk hle.

Emirates Stadium-a inkhelah Gunners tana Gabriel-a tauh chu Magpies lamin an lo chingfel thei mai lo, petchhuah an tumna lamah Sven Botman chuan anmahni lamah a dang pial lut a, chawlhlawk hmain Kai Havertz hmangin an hrem zui.

Gabriel Martinelli-a'n a tlan chakna hmangin ball a la hram a, box chhung laia awm Havertz tan thawn thla nghalin German forward hian chiang lutukin a lo khung a, chak tur a chiang hma hle.

Bukayo Saka hun a her chhuak ve leh - England international hian Havertz hnen aṭanga a ball hmuh chu box chhungah a luhpui a, a hmaah Magpies player awm nual mah se a kaw lai a hmuh fuh chat, an goal thumna chu mawi takin a khung.

Arteta nauten an la duhtawk mai lo. Declan Rice-a corner pet chu defender Jakub Kiwior-a'n lo tauhin Magpies player ten an lo tawk pial leh a, goalkeeper Loris Karius tan dan a harsa tawk a, buai nuaihin a chhuah.

Newcastle lamin Alexander Isak hmanga Gunners tlanghnung an rum ṭhaih zauh bak chu hlauhawm taka chet an nei hleithei lo a, hun tawp dawna Joe Willock-a tauh luh chuan an mualpho a hliahkhuh phak tawh lo.

Porto laka goal an khung loh hnuah Arsenal an insiamṭha nghal a, coach Arteta chuan, "Goal kan khung tam a, kan khung dan kha chi hrang hrang a ni bawk. Boruak nuam leh ṭha tak hnuaiah kan awm mek," tiin a sawi.

Newcastle United manager Eddie Howe chuan, "Arsenal hi set piece aṭanga goal khung hnem ber an ni tih kan hria, corner kha a hlauhawm dawn tih pawh kan hre sa, chutiang chunga kan inveng thei lo kha a pawi," a ti. Magpies goal chhuah pahnih kha corner aṭanga kal a ni.

Inrinni zan inkhel dangah Aston Villa chuan Nottingham Forest chu 4-2 in an hneh. Unai Emery enkawl Villa tan hian Douglas Luiz-a'n goal hnih a khung bakah striker ṭha Ollie Watkins leh winger Leon Bailey ten goal khat ve ve an khung bawk.

Villa hian Premier League match 26 aṭanga point 52 hmuin table-ah palina an ni mek a, season thara European football inelna sang ber Champions League khel turin an dinhmun an sawhnghet chho zel a ni.