Fulham lakah Man United an tlawm
Manchester United chuan an kaltluan lai takin Fulham an hneh lo a, team nem zawk laka ngaihah Erik ten Hag leh a naute hi 2-1 in an chak lo - season thara Champions League khelh phak a harsa dawn.
Man United neitu zinga mi Sir Jim Ratcliffe-a'n hmanni lawk khan Manchester City leh Liverpool te nek chhuakin, English football inelna sangah a chung bera awm an tum tur thu a sawi a, a thusawi hnu match hmasa berah Fulham an ngam loh avangin hawi san a harsa rih ang.
Hojlund awm lo
Rasmus Hojlund khelh ṭhat vanglai a ni a, mahse Fulham lakah Denmark international striker hi hliam vangin a inlan thei lo. Tlarhmaah Marcus Rashford awmin, a hnungah Alejandro Garnacho, Bruno Fernandes leh Omari Forson ten an thlawp.
Man United goal nawr a na tawk lo a, a khat tawkin an tlarhnung a phui lo leh zauh ṭhin. Alex Iwobi-a'n a laiah ṭha takin a la tlang a, mahse a shot hma hret a, goal ban hrulah na vak loin a kal chhuak - la hnaia pet na deuh turin hmun leh hun chu a nei.
Second half-ah goal kan hmu, corner aṭanga ball kal Timothy Castagne-a tauh chu Nigeria defender Calvin Bassey-a'n na takin goal lama pet a tum a, a pet fuh tawk lo. Amah bawkin ball chang lehin a shot nawnna erawh Andre Onana tan dan ngaihna a awm tawh lo.
A tawpah goal
Rashford leh Garnacho te an hriam tawk lo a, anmahni mual Old Trafford-ah ngei mai Man United goal nawr a na tawk lo. Hun tawp dawna si phurh suttu chu defender Harry Maguire daih a ni, minute 89-naah khungin VAR hmanga ennawn a nih hnuah an pawm.
Man United an phur thar, injury time khelh laiin Fernandes chuan mual lai aṭangin remchang a hmu - Portuguese midfielder hian ṭha takin pet mah se Fulham goalkeeper Bernd Leno chuan a lo dansak hram.
Mikhual team lamin an vaw let ve thung - Arsenal player hlui Iwobi chuan box chhungah amah veng tute bum tawk lekin ball a dang per a, insiamrem zeuhin goal mawi leh an chakna ni nghal bawk a khung - United tan sutna hun a awm tawh lo.
Ten Hag thu
Manchester United manager Ten Hag chuan, "January thla khan ka sawi tawh, kan tan chuan match zawng zawng hi final anga pawimawh vek a ni a, tun ṭumah hian final match pakhatah kan chak lo a ni," a ti.
Dutch manager hian tun season kal laiah a naute hi league match vawi 10-ah a tlawmpui tawh. Sir Alex Ferguson hunlai khan season khatah vawi 10 chak loh an nei ngai lo, tun season hian khelh hmabak match 12 ngawt an la nei bawk.
Ten Hag hian hliam vangain player chhawr kim theih lai a nei meuh lo. Mahse, Ten Hag chuan, "Hliam chu chhuanlam atana hman a rem rih lo. Kan neihsate hmang pawh hian chak thei tur chu kan ni," tiin a sawi.