Ramhlunchhunga goal a tawk lo

Hyderabad tan Ramhlunchhunga'n ISL-a a goal hmasa ber khung mah se, Bengaluru laka hnehna chan nan a tawk zo chuang lo a, an mikhualna ramah Bangalore club hian 2-1 in an lo hneh.

Bengaluru tan Javi Hernandez chuan minute 71-naah goal hmahruai a khung a, Kolasib tlangval Ramhlunchhunga'n minute 80-naah si phurh a sut. Mahse, Bengaluru hian Sivasakthi Narayanan hmangin an khung leh a, 2-1 in an chak daih - season hmasaa I League club Sreenidi Deccan tana khel Ramhlunchhunga hian ISL-a a season hmasa berah match 10 khel tawhin, goal a khung ta hial a ni.

Mualneitu Bengaluru tan midfielder ṭhangduang Lalremtluanga Fanai chuan inkhel bul a ṭan a, Hyderabad lamah Ramhlunchhunga bakah Jeremy Zohminghlua, Mark Zothanpuia leh Lalchhanhima Sailo ten inkhel bul an ṭan.

Inrinni zan khan Odisha FC-in ISL table chung bera an dinhmun sawhngheh an tumna kawngah harsatna an tawk a, an mikhual Mohun Bagan chu 0-0 in an inhnehtawkpui - Odisha hian table chung ber la luah chhunzawm mah se, an hnuai chiaha awm Mumbai City-in Zirtawpni zan khan 2-0 in Chennaiyin FC an hneh a, match khata khel tlem chungin Odisha hi point khat chiahin an thlau tawh.

Kalinga Stadium, Bhubaneswar khawpuia inkhelah Odisha tan ṭum dang ang bawkin Isak Vanlalruatfela a langsar a, mahse, Thingsulthliah tlangval hi a vanneih zan a ni lo - Bagan lakah goal a keng tel lo. Odisha tan hian Isak-a bakah defender Jerry Lalrinzuala leh midfielder K. Lalṭhathanga (Puitea) ten inkhel bul an ṭan ve bawk.

Inrinni zan inkhel dangah Mumbai City tan Lallianzuala Chhangte-in penalty a chhuih lut thei lo a, mahse, Bipin Singh goal hnih hmangin Mumbai hi an chak tho - an mikhual Chennaiyin chu 2-0 in an hneh. Mumbai tan hian Lianzuala bakah Lalengmawia Ralte chuan inkhel bul a ṭan.