Bawngkawnin goal an surtir

Mahindra XUV 300 LPS Cup Inter Village Football Tournament 2024 chu Inrinni khan khelh chhunzawm a ni a, tualchhung football-a hming langsar Bawngkawn chuan 7-0 ngawtin Muallungthu an sawp a, an duh aia hmain an puanthuah an teltir.

Bawngkawn tan hian Lallawmsanga leh Johny Lalruatfela te chuan goal hnih ve ve khungin, PC Malsawmtluanga leh Joseph Lalbiakthanga ten goal khat ve ve an khung bawk a, Muallungthu player B. Lalramthlangliana chuan an lamah a tilut bawk.

Ramhlun Sports Complex lamah Bethlehem Vengthlang pawh an insum duh lo a, Samlukhai chu 6-0 ngawtin an sawp. Lalrammawia chuan goal hnih khungin,Lalruatkima, Emanuel Lalhruaizela, Amos Lalnienga leh Josef Lalfakzuala Fanai ten goal khat ṭheuh an khung bawk - Samlukhai lamin a chhanletna tur an nei lo.

1st Bn. MAP Ground, Armed Veng-a inkhelah Ramhlun North-in harsatna nei loin Seling chu 2-0 in an hneh a, Vanlalhruaitluanga leh Lalremruata ten goal khat ve ve an khung.

Mahni khelmualah Ramhlun Sports Complex inkhel mah se, Zonuam lakah goal an khung thei lo a, mahse, hun pangngaia 0-0 a an inhnehtawk hnuin, RSC hi penalty-ah a vannei zawkah an ṭang a, 4-2 in an chak.

Inkhel ngaihven hlawhah Kulikawnin tualchhung football-ah hming chher leh tumin, hming langsar College Veng chu 3-0 in an hneh a, C. Siampuia, Vanlalhriatrenga leh T. Paulalmuan te goal khung hmangin hnehna hlado an chham.

Sairang Sihhmui leh Hualngohmun inkhelah goal kua ngawt a lut a, Hualngohmun hian 7-2 in hneh an chang - Vanlalthanga chuan goal li ngawt a khung a, Aldrin Ramthansanga, Johny Lalremruata leh MS Dawngzuala ten goal khat ṭheuh an thawh ve bawk.

Sihhmui tana Lalrosanga leh Vanlalneihkima goal khung chu scoreline cheimawina mai an chang zo a, Hualngohmun an chak chiang hle.