Man City chakna Phil Foden

Premier League champion lai Manchester City chuan an nomawi kawl lai hum ngei an tum. Pep Guardiola-a'n a player ṭha ṭhenkhat khek chungin Bournemouth 1-0 in an hneh - goal awmchhun hi Phil Foden khung a ni.

Inrinni zan Vitality Stadium-a inkhelah Pep-a'n Kevin de Bruyne leh Kyle Walker te chu bench lamah a dah a, tun season chhunga a vawi khat nan Julian Alvarez chu bul ṭantu zingah a tel lo bawk.

Ball chang tamin inkhel thunun viau mah se goal khung mai erawh an harsat. Erling Haaland-a'n goalkeeper Neto chauh hmachhawn tawhin remchang nei mah se goal zawnah a pet tlat lo.

Norway international hian a hnuah amah vengtu defender a paltlang hnuin angle zim tak aṭangin na takin a shot a, ball per hi awmna tur hmun dika awm Foden-a'n chiang lutukin a khung a, khualmual aṭanga point thum hmuh nan a tawk.

Man City manager Guardiola chuan, "Bournemouth khan kan inkhelh tur atan inbuatsaihna ni sarih chhung an nei thei a, keini lamin ni thum chauh hun kan nei thung, chutiang kara hnehna kan chan avangin min ṭantu lam pawh an lawm hle turah ka ngai," a ti.

Citizens hian league hmahruaitu Liverpool an phak lohna chu point khat chauh a ni. Reds kal fal tir an duh si lo, chuvangin harsa angreng taka Bournemouth mual aṭanga point thum hlawhchhuah hi a hlu kawp ang.

EPL bikah Manchester United, Liverpool, Brighton, Arsenal leh Aston Villa te an hmachhawn dawn, hemi karlakah hian FA Cup leh Champions League khel tur an nei bawk - Man City tan March leh April thla hi fiahna hautak lai ber a ni dawn.