Bayern chhantu Harry Kane

Harry Kane chuan Bayern Munich tan goal hnih a khung leh ta a, RB Leipzig lakah Bundesliga champion hi 2-1 in a chakpui - league match hnih a zawna an tlawm hnuah an chak ve leh ta a, mahse, Zirtawpni zan khan hmahruaitu Bayer Leverkusen chuan 2-1 a Mainz 05 an hneh avangin Xabi Alonso enkawl team hi point riat ngawtin an la phak lo mek.

Kane hian minute 56-naah goal hmahruai a khung a, Leipzig-in Benjamin Sesko hmangin si phurh an sut - Bayern hi an chak zo lo leh mai dawn niin a lang hman a, mahse, hun pek belhah Kane bawkin khung lehin, 2-1 in Bayern an chak.

Kum 30 mi Kane hian league match 23-ah goal 27 ngawt a khung ta a, amah hnaih bertu VfB Stuggart striker Serhou Guirassy aiin goal kuain a khung tam zawk - European top five league-ah amah aia khung tam an awm lo a, hnaih bertu Kylian Mbappe chuan goal 21 chiah a la khung.

Kar hmasa lawk khan season khata Bundesliga goal 25 khung thei rang ber record a siam a, match 22 chiah a mamawh. Borussia Dortmund striker hlui Erling Haaland-a record a khum - Budesliga season hmasa bera goal khung hnem ber record lo siam tawhtu, Bayern tana goal 25 khungtu Luca Toni record a lehpel ta bawk.

Hetihrual hian Bundesliga season khata goal khung hnem ber, Bayern striker hlui Robert Lewandowski-a'n (41 goals) 2020-21 season-a a lo siam tawh khum tur erawhin hun a la mamawh a, match 11 an la hmabakah goal 15 tal a khung a ngai dawn.

Mahse, Kane hian a duh ber chu nomawi a ni a, chumi tur chuan an chetsual tawh lo a, Leverkusen chetsual an chan tel a ngai. Alonso naute hian Zirtawpni zan khan Mainz 05 chu 2-1 in an hneh a, Granit Xhaka goal hmahruai khung chu Mainz hian Dominik Kohr hmangin sut mah se, Robert Andrich chuan Leverkusen tan chakna goal a khung zui.

Leverkusen hian German record thar siamin, inelna hrang hrangah match 33 zet chu tlawm an nei tawh lo a, Bayern-in 2020-a record an lo siam tawh, match 33 a zawna tlawm loh chu an khum.

Bayern striker Kane chuan hei hi beidawn phah nan hman a tum lo. England captain chuan, "Theihtawp chhuahin kan nawr zel ang a, kan thiltih hi kan chhunzawm zel a ṭul. Hnehna kan chan avangin a lawmawm ka ti a, kum tawp thlenga tha thlah loa kan beih a ṭul a ni.

"Kan beidawng dawn lo a, kan tawp mai dawn lo," a ti - Bayern hi nomawi chawi loa season khar thei dinhmunah an ding mek. Coach Thomas Tuchel kaihhruaina hnuaiah beisei an phak lo a, August khan German Super Cup-ah an tlawm a, German Cup second round aṭangin third division club Saarbrucken-in an pet chhuak a, Champions League round of 16 first leg-ah Lazio chu 1-0 in an ngam lo bawk.