Barcelona-in Getafe an sawp

Champions League-a Barcelona-in Napoli an inhnehtawkpui hnuah La Liga lamah an theihna tak tak an pholang a, Getafe chu 4-0 ngawtin an sawp - champion beiseina thar an nei ve leh ta bawk.

Catalan club tan hian Raphinha, Joao Felix, Frenkie de Jong leh Fermin Lopez ten goal khat ṭheuh an khung a, Getafe-in a chhanletna tur an neih ve loh avangin Barca khelmualah an tlawm.

Barcelona-in hnehna an chan avangin champion beiseina an nei thar ve leh a, table-ah pahnihnaah an awm chho. Hmahruaitu Real Madrid chu point nga chiahin an thlau a, Girona-in pathumna dinhmun an luah thung.

Real hi nizan khan an inlan a, hnehna an chang a nih chuan Barcelona nena an inthlauhna hi he thuziak i chhiar meuh chuan a danglam leh tawh ang. Girona hian zanin dar 1:30-ah Rayo Vallecano an mikhual dawn a, an chak chuan Barca an tlanpel leh dawn bawk - Inrinni zan inkhel dangah Atletico Madrid an chak zo lo a, khualmualah 2-2 in Almeria an inhnehtawkpui.

Beiseina thar

Copa del Rey quarterfinal aṭanga Athletic Bilbao-in an petchhuah hnuah Barcelona-in league match nga khelin, vawi thum chiah an chak a, vawi khat draw an nei. Champion tum Barca tan result ṭha a ni lo a, season tawpa chhuak tur chiang Xavi tan lu a hai.

Spanish coach hian Champions League-ah result a nei ṭha lo zui a, last 16 first leg-ah Napoli nen 1-1 in an inhnehtawk. Mahse, Inrinni zanah Barca an insiamṭha ta a, goal an khung thei tih an pholan bakah, an tlarhnung a phui thei tih an pholang tel.

Barca tan Raphinha chuan minute 20-naah goal hmahruai a khung a, goal dang lut loin chawlhlawk an hmang a, second half-ah Barca tak tak an inlar - Joao Felix chuan minute 53-naah a belhchhah a, minute 61-naah De Jong chuan a khung ve zui.

A la tawk lo cheu - bench aṭanga luhtir, kum 20 mi Fermin Lopez chuan Barca lunglawm tikim turin an goal lina a khung ve leh a, mahni mualah chiang takin Catalan club an chak.

Atletico an buai

Inrinni zana Almeria an lenchilh hmain Atletico-in inelna hrang hranga an match hnuhnung pangaah vawi khat chiah chak an nei a, vawi thum tlawmin, vawi khat an draw a, an thawnthu duhawm lo her danglam tum viau mah se an thei lo.

La Liga table mawngphah luahtu Almeria lakah Atletico hian vawi hnih ngawt hma an hruai. Minute hnihna lekah Angel Correa chuan goal hmahruai khungin, "Engzat tak Atletico hian khung ang maw? tih chu rilrua zawhna lo awm a ni.

Mahse, Atletico beisei angin thil a kal lo. Luka Romero chuan minute 27-naah si phurh a sut a, 1-1 ni chungin chawlhlawk an hmang zui. Minute 57-naah Rodrigo de Paul inlar ve leh zuiin, Atletico chu hma a hruai nawnpui.

Tun season La Liga-a chak la nei lo Almeria-in kut ruaka awm an duh bik lo. An goal hnihna an chhuah aṭanga minute sarihna lekah Romero bawk inlar lehin, an si phurh sutna goal a khung leh a, 2-2 in inkhel a tawp.