Mizoram hun a inher chhuak ve ta

FIFA Santosh Trophy final round-ah Mizoramin match hnih chhung chak hmel an hmuh loh hnuin nimin khan inkhelh hmaa group B hmahruaitu Delhi chu 5-1 in an sawp. Coach Lalsangzuala Hmar leh manager K. Lalenghluna hote hian point thum hlu tak an hlawhchhuah avangin knockout stage luh theihna kawng an zawh leh ta.

Group B inkhel dangah Railways-in Mizoram hneh loh Maharashtra 2-1 in an hneh leh thung. Nizan khan Manipur leh Karnataka inkhelin result kan hre hman lo. Mizoram hian February 29, Ningani chawhma dar 10:00-ah Manipur an hmachhawn ang.

Nizan inkhel chhiar tel lohin Mizoram, Manipur, Delhi leh Railways ten point li vek an hmu a, Maharashtra-in point thum bak an la hmuh belh lo. Table tawp berah champion lai Karnataka an awm. Match thum khelh tawh aṭanga thlir chuan quarterfinal lut tur hriatthiam a la har hle.

Boruak a rit

Mizoramin match hmasa berah Maharashtra an hmachhawn a, 3-1 in an chak lo. Maharashtra laka an tlawm avangin Mizoramin 'pressure' an nei ṭan a, match hnihnaah champion lai Karnataka lakah 2-0 a hma an hruai hnuah an sut zawhtir.

Coach Sanga hoten match hnih aṭangin point khat chiah an hmu a, an dihmun a ṭha lo. Mizoram team chhungah pressure a awm ṭan a, chutihrualin tawnhriat nei ṭha player an neih an hlawkpui. Boruak rit karah tawnhriat nei ṭha player-ten an zia an hloh lo a, chak duhin an la tuihal reng bawk.

Coaching staff leh player-te rilru put hmang hian training-naah rah ṭha a thlen a, Delhi an hmachhawn hmaa training chu tun Santosh Trophy inpuachahna training boruak nawm ber ṭuma chhal theih a ni hial. Mizoram team hian hun awl neih an hmang ṭha a, 'video session' neiin an tihsual lai an en let bawk.

Thawhrim rah a thlum

Delhi hi group stage-ah Santosh Trophy-a champion hnem ber West Bengal leh team ṭha Punjab titlatu an ni a, match hmasa pahnihah team ṭha an ni tih lantirin Railways lakah inkhel thunun chungin goal li an khung. Mizoramin an khingpui an hrechiang a, fimkhur takin bul an ṭan a, ṭum dang zawng aiin player-ten an hna an hrechiang.

Mizoram striker MC Malsawmzuala chu goal khung tura lut ni ringawt loin defender hmasa ber a ni tawh a, Delhi-in Mizoram tlarhnung thlen phei an harsat a, hei vang hian ball an vawrh nasa. Delhi-in Railways laka an game mawi an chhunzawm thei lo a, Mizoram winger Lalthankima'n (Thathana) an tlarhnung a chhaih buai nasa bawk.

Minute 26-naah Ephraim Lalremtluanga'n Delhi ball in pass lai chhuhsakin MS Dawngliana a pe nghal a, Dawngtea hian Thathana pe lehin Ainawn rawlthar duhawm ball pass ṭha chu MC-a'n goal-ah a chantir. Training ground ang maia mawi a ni.

Minute thum hnuah MC-a'n mual dinglam kilah ball a thawn thla a, Thathana'n ball hi changin a hnunga pawttu Lalrinzuala a pe. Police defender Rinzuala cross ṭha chu Malsawmzuala Tlangte-in a tauh lut.

Mizoram an che ṭha chhunzawm zel. Delhi-in Mizoram an nawr tawm a, an tlarhnung chhing ṭha tak chu defender Lalhmunmawia'n vawrh khumin Sawma Tlangte-in a um lut a, vawi khatnaah khung nghal lo mah se a thawhrim rah sengin minute 32-naah Mizoram goal thumna a khung.

Minute 38-naah keeper F. Lalmuanawma'n na zetin a vawm chhuak a, Thathana'n chak zetin ball a kalpui nghal. Aizawl FC academy chhuak Thathana cross hi MC-a'n vawi khatah pet nghalin Mizoram goal lina a khung.

Second half-ah Mzioramin goal venhim an ngai pawimawh a, counter attack-na remchang erawh an zawng reng. Minute 67-naah Dawngtea'n goal mawi zet a khung a, Bawngkawn forward finishing tawih ang thoin ball petu R. Malsawmtluanga class sanzia a lang.

Fimkhur a ṭul

Mizoram inkhelah match tinah hmasawnna a awm a, Delhi lakah minute 90 chhung goal an venghim ṭha. Bench aṭanga lut Lalengmawia, HP Lalremruata, Malsawmfela, Vanlalbiaa Chhangte leh FC Lalhmunmawia ten an hna an thawk ṭha viau. Sawmfela vanneih ṭum ni se, goal dang pawh an khung belh ngei ang.

Chutihrualin hun tawp hma hretin captain Lalrinzuala Tochhawng a chesual a, awlsam taka petchhuah turah goalkeeper back pass a thlang a; Delhi captain Mohit Mittal tan ball duhthusam a nih chiah avangin Mizoramin goal an chhuah phah.

Santosh Trophy final round a nih tawh avangin team tin an intluk tawk tawh a, quarterfinal luh leh luh lohna hi point ni loin goal difference a ni zawk thei tlat. Mizoram hian match thumah goal riat khung mah se goal ruk an chhuah tawh a, goal venhim kawngah an fimkhur lehzual a ṭul hle.

Mizoram manager K. Lalenghluna (Maenga) chuan, "Delhi hi an khelh tawhna pahnih thlir khan team ṭha an ni tih ka hria a, ka huphurh ang reng hle. Team boruak a ṭha a, theihtawp kan chhuah a, kan beisei phak bak result kan hlawh chhuak. Kan ṭawngṭai hnem a, Pathianin min awmpuiin ka hria. Goal chhuah loh chu duh mah ila, kan goal chhuah hi kan khelh leh tur atana min fuihtu a nih ngei ka beisei," tiin Vanglaini a hrilh.

Mizoram coach Lalsangzuala Hmar chuan, "Match thumah vawi khat kan chak chauh a ni a, inchhuang tur kan awm lo. Kan tum ram thleng turin rim lehzuala kan thawh a ṭul a ni," tiin a sawi a, Itanagar-a Mizo awmte thlawp ṭhatna avangin lawmthu a sawi bawk.