Final khel tur pahnih a chiang

Mizoramin a thlen Khelo India University Games 2023 mipa football chu final khel tur team pahnih a hriat theih ta. University of Calicut leh University of Kerala te chuan an khingpui ve ve hnehin final an lut.

Nimin khan Rajiv Gandhi Stadium, Mualpuiah semifinal khelh a ni a, inkhel hmasa zawkah University of Calicut chuan Mahatma Gandhi University chu 4-0 a hnehin final an lut a ni.

Semifinal hnuhnung zawkah University of Kerala leh Punjabi University te hun pangngaiah 2-2 in an inhnehtawk a, penalty shootout hmanga chak zawk zawn a nih hnuah University of Kerala chu 4-2 in an chak.

Vawiin hian mipa football hi a hmawr bawkna neih a ni dawn. Rajiv Gandhi Stadium-ah tho khelh leh tur niin, tlai dar 4:00-ah kharna hun hman ṭan a ni ang a, he hunah hian sports minister Lalnghinglova Hmar chu khuallian a ni ang.