Sheffield buaina a zual zel

Premier League aṭangin Sheffield United chu tla mai thei dinhmunah an ding reng a, an buaina hi an chingfel mai dawn lo niin a lang - Wolverhampton Wanderers lakah 1-0 in an tlawm leh ta.

Pathianni zan khan Premier League inkhel pakhat awmin, mualneitu Wolves tan Pablo Sarabia chuan minute 30-naah goal awmchhun a tauh lut a, goal an venhim zui avangin point thum hmuh nan a tawk.

Gary O'Neil-a enkawl Wolves hian point 38 hmuin pariatna dinhmun an luah - European football khel phak chin Brighton & Hove Albion an phak lohna chu point khat lek a ni a, season tharah Europe-a inlan an beisei ngam mek a ni.

Wolves manager O’Neil chuan, "Rayan leh Pablo ten khatianga ball an insiamsak theih nan khan vawi tam tak kan zir tawh a, tunah a rah kan hmu thei kha a lawmawm takzet a ni. Ball petuin a thiam a, a tauhtu a zuang thiamin a hun a dik chat bawk," tiin a sawi.

Chris Wilder-a enkawl Sheffield erawh table mawngphah luahtu an ni chhunzawm, point 13 chauh an la neih avangin a him china awm Everton an phak lohna chu point riat lai a ni - inhamtan a harsa tawhin a rinawm.

Wilder chuan, "Theihna kan nei a, chumi anga kan khel chhuak thei tlat lo hian min tihrehawm. Ka naute hian inbuatsaihna pawh an nei ṭha, khualmual chhunga kan buai tlat ṭhin hi a pawi lai chu a ni. Wolves kha keini aia ṭha an ni bik lo, mahse an khel ṭha zawk tlat si," a ti.