Club goal 750 khungtu Ronaldo

Cristiano Ronaldo chuan sulhnu ṭha hriatreng tawh tur a hnutchhiah belh leh ta. Portugal captain hian Pathianni zan khan Al Nassr tan penalty a chhuih lut a, club inelna bikah goal 750 a khung tling ta.

Saudi Pro League inkhelah Al Nassr leh Al Shabab te intawngin, minute 22-naah Iago Santos chuan handball vangin penalty a chawi, a pet tura rawn ding chhuak Ronaldo chuan a khung.

Ronaldo bakah hian Talisca chuan goal hnih khungin Al Nassr hi 3-2 in an chak. Ronaldo awmna team hian league match 20 aṭanga point 52 hmuin table-ah pahnihna an ni mek, an chungah point 56 neitu Al Hilal an awm.

Kum 39 mi Ronaldo hian kuminah match li khel tawhin goal a la khung vek. Nikum nena chhiar zawmin league match a khelh hnuhnung pakuaah goal a la khung vek bawk, a kum tam deuh tawh mah se a la hlauhawm hle.

Club leh ram tana goal 877 khung tawhtu Ronaldo chuan, "A tawp thlengin kan bei zel ang, kan tawpsan mai tur a ni lo," a ti. Al Hilal an phak lohna point li a ni a, match khatin an khel tam bawk - Ronaldo a la beidawng lo a, beih chhunzawm zel a tum.