Ka tana nomawi hlu ber a ni - Jurgen Klopp

Liverpool boss Jurgen Klopp hian Champions League nomawi meuh pawh a chawi tawh a, an la champion ngai lohna Premier League-a Liverpool a champion puite kha a ropui takzet - Bayern Munich rorelna Bundesliga-ah meuh pawh vawi hnih ngawt Borussia Dortmund champion pui thei a ni.

Mahse, hetiang khawpa coach ropui hian English football-a inelna ngaihhlut hlawh lo ber League Cup nomawi a chawi chu a champion tawhnaa hlu ber a nih thu a sawi - a chhan in hria, naupang rual nen a champion miau alawm.

Klopp chuan, "Kum 20 chhung coach hna ka thawk tawh a, zanin kan champion-na hi ka tan chuan a la hlu ber a ni. Ka sulhnu leh ka hming an sawi reng dan tur lam ka ngaihtuah lo a, chutiang ti tura lo kal pawh ka ni lo.

"Hnathawk tura lokal ve mai ka ni a, thil tam tak kan zir a ni. Manager-te chu kal chhuak pawh ni ila, a pawi lo. Mipui zawk hian he club hi hawisan se kan buai ang - tun ang renga kan fan-ten he club hi an thlawp chuan Liverpool hi ka ngaihtuah lo," a ti.

Reds hian an player langsar zingah Mohamed Salah, Diogo Jota, Darwin Nunez, Trent Alexander-Arnold leh Dominik Szoboszlai te an chhawr thei lo a, Chelsea lakah hian kum 20 hnuai lam player pangain Liverpool jersey hain final an khel a, Merseyside club tana a tawp khartu player-te kum chawhrual kha kum 22 aiin a hniam!

Klopp chuan, "Zanin thil thleng hi a mak danglam takzet a, thil theih loh ang hial a ni zawk ang chu. Kan team, squad leh academy te kha an paukhauh em em a, he team special zinga ka tel ve thei hi ka lawm a ni.

"A mak ka tihber mai chu, champion kan phu tlat hi a ni. Kan vanneih chang a awm a, anni pawh an vanneih chang a awm. Ka naute khan hun harsaah an theihna an pholang a, a lawmawm takzet a ni," a ti a, a hlim hle.