Na kan ti tur a ni - Poch

Chelsea manager Mauricio Pochettino chuan Liverpool laka an tlawmna chu a player-te chuan la na se a duh thu a sawi a, "Na an ti tur a ni. Nomawi chawi duhin kan khel a, mahse, kan hlawh chhuak zo lo. Tunah chuan ka rilru thawi dam zo engmah a awm lo," a ti!

Blues hian chance nei lo an ni lo. Mahse, Alisson Becker awm lo mah se, Caoimhin Kelleher an paltlang thei chuang lo. Cole Palmer leh Conor Gallagher ten chance duhawm an hlah ve ve a, minute 90 tawp hnaih lama Liverpool box chhunga ball leng vel kara Christopher Nkunku, Gallagher leh Malo Gusto ten an khung thei lote kha a mak hlei hlei.

Poch chuan, "Heti maia thamral hi kan duh lo a, hmalam kan pan a ṭul. Player-te pawh hian keimahni ang thoin na an ti ve tur a ni a, tun aia kan thawhrim a, thil ṭha zawk kan tih a ngai tih hi an hre tur a ni. Hmasawn kan mamawh a, tun hnai kum sarih vel chhunga nomawi lian apiang beisei ṭhin team lakah paukhauh kan zir a ṭul.

"A pawimawh ber chu final kan khel hi a ni a, nomawi chawi tura inpek a ngaihzia kan hriatthiam nan a ṭha a ni. Liverpool hi Champions League final leh Europa League final-a an tlawmte kha ka la hre reng. Mahse, an hmachhawpah rinna an nghat tlat a, an duh ber an neih hma chuan an bei ṭauh ṭauh a ni.

"Liverpool hi entirna ṭha tak an ni. Liverpool ang team nena inel zel hi kan duh. Nomawi kan chawi loh avangin hrehawm kan ti tur a ni lo. Beiseina kan neih zel a ṭul a, chu chu a pawimawh em em a ni," a ti.