Liverpool tana langsar rawlthar rual

Jurgen Klopp-a'n season tawpah Liverpool a chhuahsan dawn a, mahse, Reds Manager thar tur tan hna a hautak dawn lo - Klopp hian Anfield a pan tirh nena khaikhin chuan player ṭha tak a hnutchhiah dawn a, academy chhuak player duhawm tak tak a hnutchhiah tel dawn bawk.

Chelsea lakah kum 20 mi Conor Bradley thlak turin kum 19 mi Bobby Clark chu minute 72-naah luhtir a ni a, kum 18 mi Jayden Danns leh kum 19 mi James McConnell te chu Cody Gakpo leh Argentina tana World Cup nomawi chawitu Alex Mac Allister thlak tura luhtir an ni.

Jurgen Klopp-a'n player a neih loh miau avangin final-ah 'risk' a la a ni ber a ni a, bench aṭanga luhtir rawlthar rual Clark, McConnell leh Danns te Liverpool tana an inlan zat belhkhawm chu 15 a ni - mahse, pound tluklehdingawn tela din Chelsea an hneh.

Liverpool rawlthar rual zinga senior match khel hnem tawh ber chu Bradley a ni a, mahse, ani pawh hian a khel tam chuang lo -match 16 a khel ve chauh.