Luka Modric a la tar lo

Real Madrid chuan La Liga hmahruaitu an nihna an chhawm nung zel a, Pathianni zan khan Sevilla chu 1-0 in an hneh - inkhela goal awmchhun hi Luka Modric khung a ni a, kum 38 mi midfielder hian a la tar lo tih khelmual chhungah a pholang leh ta.

Real Madrid-in hnehna an chan avangin La Liga-ah hmahruaitu an nihna chu an sawh nghet lehzual sauh a, pahnihna Barcelona aiin point riatin an sang zawk mek.

Hetihrual hian nizan khan Girona an inlan a, Rayo Vallecano an mikhual - an result kan hre hman lo. Beisei phak baka season hmangtu Girona hi an chak a nih chuan pahnihnaah an chho leh ang a, Real nen an inkarah point ruk a awm ang.

Real Madrid captain hlui Sergio Ramos chuan Sevilla jersey hain Santiago Bernabeu a lut a, sulhnu tam tak a lo hnutchhiah tawhna club lakah point a hlawh chhuak thei lo.

A harsa

Bernabeu-a inkhel ni mah se, Real-in Sevilla lakah goal khung an harsat a, Lucas Vázquez-a'n Real tan goal a khungah inngai mah se, video assistant referee a inrawlh hnuah goal luh hmaa Nacho chu Sevilla forward Youssef En-Nesyri laka a foul avangin pawmsak a ni lo.

Sevilla goalkeeper Orjan Nyland chu a changtupa a ni a, Norwegian keeper hian Vinicius Junior leh Federico Valverde chance hlauhawm zet chu ṭha takin a dansak ve ve a, Valverde hian post a pet per bawk - a vanduai hle.

Real hian vawi 16 ngawt shot an nei hial a, 64% ball changin inkhel an thunun hle. Sevilla hian vawi li shot an nei ve a, Real tana hnawksak lo tawp anga sawi bik erawh an rem lo.

Sevilla hi counter-attack-ah innghatin, Real tlarhnung an ṭhiat ve leh zauh ṭhin a, mahse, si ban nghaktu Andriy Lunin-a'n goal chauh veng loa sweeper-keeper hna thawkin, a hna tlin zarah Sevilla chance hlauhawm tur chu a thamral leh ṭhin.

A hunah tak

Real-in an thiampuipa Jude Bellingham chu a zawna a vawi thum nan an chhawr thei lo a, English midfielder tel loin an hmuhnawm tawk lo. Tlarhmaah Brahim Diaz, Rodrygo leh Vinicius awm mah se, a pawimawh ber goal an hlawh chhuak thei lo a, a tawpa chhandamtu chu Modric a ni.

Croatian midfielder hi minute 75-naah luhtir ve chauh a ni a, mahse, danglamna thlen turin Modric tan hun a la tam tawk - minute 81-naah Modric hian a thiam a la theihnghilh lo tih pholangin, mawi lutukin a khung.

Sevilla-in Bernabeu-ah point hlawhchhuah an inbeiseina chu khelmualah minute ruk chauh a awm hman tihin a thamral tir nghal a, a kum tam leh squad chhah vangin hmun chang tam tawk lo mah se, he player hian 'quality' a la nei reng tih a pholang.

Real hian an league match hnuhnung berah Rayo Vallecano chu rin loh takin 1-1 in an inhnehtawkpui a, Sevilla lakah point hloh thei dinhmuna an din hnuin Modric-a'n a chhan.

Khawiah nge Modric?

Modric hian tun season-ah league match 21 chiah a la khel a, heng zinga 11-ah chiah hian inkhel bul a ṭan. A kum a tam ve tawh a, Real squad a chhah bawk avangin a awm lo hran lo - chutihrual chuan Ballon d'Or meuh lo dawng tawh a ni a, awm thiam a har ang tih a chiang.

Croatia international hian June-ah a contract a hmang zo tawh dawn a, Real-ah a cham chhunzawm zel a rinawm tawh lo. Real boss Carlo Ancelotti chuan, "Mi zawng zawng hmaah ka tan ani ang player bench-a dah chu a namai lo tih a pholang a ni. Goal vanga fak chiam ka ni lo a, a training dan en ula, mak inti zawk ang.

"Squad pumpui tana entawn tlak player a ni a, ani ang bul ṭantir loh chu a hrehawm ṭhin. A contract chungchang pawh sawi thiam a harsa - kei pawh player ka lo ni ve tawh ṭhin a, ka hun tawp lamah khan a dinhmun angah hian ka lo ding tawh.

"A khelh tam loh vanga a lungawi lo a nih pawhin ka hrethiam thlap. Mi zawng zawngin a career a tawp hnai tawhah an ngai a, mahse, ani chuan a pawm ve lo. A thathoin a za em em reng a, kum 38 ang pawhin a lang lo," a ti a, a player a fak hle.