FC Goa an tlawm leh tawh!

February 14 khan Mohun Bagan chuan 1-0 in FC Goa an hneh a, tun season ISL-a Goan club an tlawm hmasak ber a ni. Mahse, Kolkata club laka an tlawmna hian anchhia a keng tel emaw tih mai tur a ni a, a hnuah NorthEast United leh Kerala Blasters hmachhawn lehin, an tlawm ve ve!

February thlatira ISL match 12-a tlawm nei lo team kha a zawnin vawi thum an tlawm ta - Pathianni zan khan Kerala Blasters chuan 4-2 in Goa hi an hneh a, Manolo Márquez enkawl team hi table-ah pawh pangana an ni tawh.

Blasters khelmualah Goa hian goal an khung hmasa zawk a, Rowllin Borges leh Mohammed Yasir te chuan minute 17 chhungin goal khat ve ve an khung - an mualah South Indian club an mualpho dawn niin a lang hman.

Mahse, second half-ah Kerala dang daih kan hmu - Japanese midfielder Daisuke Sakai chuan minute 51-naah freekick hmangin, mawi zetin si phurh a sut ṭhen a, mahse, nuamsa erawhin goal dang an khung zui bik lo a, minute 80 an nghah thlen a ngai.

Minute 81-naah Dimitrios Diamantakos chuan penalty hmangin si phurh a sut zo a, a duhtawk mai lo. Greek club ṭha Olympiakos striker hlui hian minute thum hnu lawkah hmahruaina goal a khung zui a, chak nemngheh nana Fedor Cernych goal khung tur a siamsak zui bawk.

Goa tan hian Dinthar tlangval Ayush Chhetri chu bench aṭangin luhtir a ni. Nizan khan ISL inkhelah East Bengal chuan Chennaiyin mikhualin, an result kan hre hman lo a, zanin dar 7:30 hian Mizo rawlthar tamna Hyderabad chuan Punjab FC an mikhual ang.