Mellung phuntu Lautaro Martinez

Lautaro Martinez chuan Inter Milan tan Serie A goal 100 a khung tling ta. Argentina international striker hian Lecce lakah goal hnih khungin a team hi 4-0 in a chakpui.

Kum 26 mi Martinez hian Inter tana a league goal 100-na chu minute 15-naah a khung a, chawlhlawk zawh hnuah Davide Frattesi-a'n khung vein, chumi hnuah Martinez bawkin a goal 101-na a khung belh.

Serie A hmahruaitu hian an chak nemngheh nan Stefan de Vrij hmangin an goal lina an khung a, Italian football inelna sangah hian match 25 aṭanga point 66 hmuin an hmahruaina an sawhnghet zel.

Tun season Serie A goal 22 khung tawhtu Lautaro Martinez chuan, "Season hmasa khan Champions League final kan thleng a, champion ta chiah lo mah ila kan thlen sanna khan nasa takin inrintawkna min pek belh.

"Kan thlen china lungawia duhtawk mai thei erawh kan la ni lo. Ni tin mai hian hmasawn tumin kan bei tur a ni ang, hma kan sawn loh chuan kan elpui dang ten zawi muangin min rawn kalsan mai ang.

"Football khel tur hian kum 15 mi ka nih laiin kan chenna in ka chhuahsan a ngai a, tun hun ang hi kan duhthusam chu ni mah se kan beisei ngam ngai lo. Inter tana sulhnu ṭha zawk neih tumin ka bei zel dawn," a ti.

Inter Milan manager Simone Inzaghi chuan, "Lautaro hian zinkawng ngaihnawm leh danglam tak a nei. Hetiang thawnthu ang deuh hi Lazio ka enkawl lai khan Ciro Immobile hnen aṭangin ka lo hre tawh bawk.

"Hma hun thui tak a la nei a, thil tawn tur tam tak a la nei. Inter tana mi hlu bik a ni reng tawh dawn a, he club tan hian eng ang sulhnu nge a hnutchhiah zel dawn tih chu hunin a la hril ang," a ti.

Pathianni zan inkhel dangah Juventus chuan an mikhual Frosinone chu 3-2 in an hneh a, an chunga awm Inter Milan an um ve zel. Old Lady leh Inter inkarah hian point kua ngawt a awm - Juve hi match khatin an la khel tam bawk.

AC Milan erawh Atalanta nen 1-1 in an inhnehtawk a, an tan champion beisei ngam a harsa tawh ang. Champion lai Napoli pawh Cagliari nen 1-1 a an inhnehtawk leh tak avangin an nomawi kawl lai chu an hloh tia sawi ngam a ni tawh.