Mbappe leh PSG an chelh

Inrinni zan Ligue 1 inkhelah Paris Saint Germain leh Rennes te 1-1 in an inhnehtawk a, inkhelh banah PSG manager Luis Enrique chuan Kylian Mbappe tel loa khelh an zir a ngai tih a sawi.

Paris khawpuia inkhel ni mah se mikhual Rennes lamin Amine Gouiri hmangin goal an khung hmasa a, an hum rei hle bawk. Mahse, hun tawp hma chiahin PSG lamin Goncalo Ramos-a penalty hmangin si phurh an sut hram.

Inkhelah hian Mbappe chuan captain armband hreng chungin bul a ṭan a, goal khung theihna remchang pawh insiam nual mah se goal erawh a pai ta bik lo a, khelmual pawn lam boruakin a la chiah tih a hriat ve bawk.

France captain hian season kal laiah Ligue 1 goal 21 a khung tawh a, ani aia khung tam an awm lo. Tun season tawp rualin PSG tana a contract a zo dawn a, season tharah Real Madrid a zawm dawn tih pawh a chiang tawh.

PSG manager Enrique chuan, "Kylian tel loa khelh kan thiam a ngai, a chhan chu tun aṭanga rei lo têah emaw a rei deuh hnuah emaw chutiang hun chu a lo la thleng dawn tho tho a ni.

"Tun hun chauh ni loin season thar pawh kan ngaihtuah tel a ngai a, chuvangin player zawng zawngte chu inelna ṭha hmachhawn turin ka duh a, champion châka tuihal turin ka beisei bawk," a ti.

An league match hnuhnung 18 zetah PSG hi an tlawm lo. Ligue 1 match 23 aṭanga point 54 hmuin anmahni hnaih bertu Brest aiin point 11 ngawtin hma an la hruai fal a ni.