Kum 52 mi Miura a la chawl dawn lo
Khawvela professional footballer upa ber Kazuyoshi Miura chuan chawlh mai a la tum lo a, kum 52 mi striker hian season thara Japan rama league sang ber J1 League khel turin contract thar a ziak leh ta.
February 26-a kum 53 tling mai tur striker hian a club khelh mekna Yokohama FC-ah contract thar hi a ziak a, season hmasa khan a club tan hian league match thum a la khel ve thei a ni. King Kazu tia hminglem an pek striker hian kum 1982 khan Brazilian club lar Santos-ah a career a ṭan a, a club khelhna Yokohama hi season hmasa khan second division-ah khelin division sang berah an inpetkai.
Japanese striker hian kum 2007 hnuah khan top flight football-a khel leh tawh rih lo a, a khelh hnuhnun ber season-ah hian kum 40 mi a ni. Miura hian Brazilian club lar Palmeiras, Serie A club Genoa, Croatian club ṭha Dinamo Zagreb leh A League club langsar Sydney FC tan pawh a lo khel tawh a, Japan tan match 89-a khelhah goal 55 a khung thei.
Miura zinkawng
• Kum 15 mi lek niin kum 1982 khan Japan chhuahsanin Brazil a pan a, Santos-ah a lut. Brazil Serie A club tan hian kum 1986-ah a match hmasa ber a khel a, kum 19 mi a ni.
• Kum 1986-ah vek hian Santos chhuahsanin Palmeiras a zawm.
• Kum 1993 khan J League season hmasa berah a khel a, top scorer a nih bakah Most valuable player a ni bawk a, he chawimawina dawng tur hian khawvel huapa star langsar ni phak Gary Lineker leh Zico te a khum thei.
• Kum 1993 vek khan Asian Player of the Year atan thlan a ni a, Japanese player zinga he chawimawina dawng hmasa
ber a ni.
• Kum 1990-ah Japan tan a match hmasa ber a khel a, World Cup qualifier-ah goal 14 khungin kum 1998 khan Japan chu a vawi khat nan World Cup a hruai thleng. Mahse, mak tak maiin squad aṭanga paih a ni a, kum hnih hnuah ram tana inkhelh a chawlhsan zui.
• Europe-ah Genoa leh Dinamo Zagreb tan a khel a, kum 1999 khan Zagreb nen hian Croatian league nomawi a chawi.
• Kum 2005 khan kum 38 mi niin a club khelh mekna Yokohama FC a zawm a, league match 250 a khelhsak tawh.