Langtlang leh rintlaka sum enkawl kan ngai pawimawh hmasa dawn - CM

Nimin Assembly Budget Session-a budget a pharhnaah chief minister Lalduhoma chuan, langtlang leh rintlak taka sum leh pai enkawl an ngaih pawimawh hmasak dawn thu a sawi.

Chief Minister chuan, budget an buatsaih laia an ngaih pawimawh ber chu Zoram mipuite tana ei leh bar zawnna kawng tlo leh nghet zawka buatsaih a nih thu sawiin, "Chumi tihlawhtling tur chuan langtlang leh rintlak taka sum leh pai enkawl hi kan ngaih pawimawh hmasak tur a ni. Sum hian mipuite a thleng ngei a ni tih leh ṭangkai taka hman a ni ngei tih hi finfiah kan tum tlat," a ti.

November 30, 2023-a revenue leh capital head aṭanga an hmuh chin chu cheng vbc. 6,378 a nih thu sawiin Lalduhoma chuan, "Hemi hun chhung veka kan sum hman chhuah chu cheng vbc. 6,925 a ni a, kan leiba tlingkhawm chu cheng vbc. 12,966.93 a ni," a ti a, November 30, 2023 a RBI state account-ah minimum balance awm tur a awm loh avangin ways & means hmanga sum puk a nih thu a sawi.

CM Duhoma sawi danin, pension leh retirement benefit dangte State Treasury hrang hrang hnuaia pek chhuah loh la awm zat chu cheng vbc. 238.13 a ni.

Sum dinhmun der­thawng taka a awm avangin ngai awh chho leh turin 'year of consolidation' puan loh theih a ni lo tih sawiin Chief Minister chuan, "Mipuite beiseina tihlawhtling turin kan inbuatsaih mek. Kan sorkar chu hmasawnna rual­khai, ngelnghet siam tur te, kan chhehvela ram­ngaw leh nungchate hum­halh chung si-a hma­sawnna hnathawk turin a inbuatsaih mek," a ti.

Lalduhoma chuan hmelhma kumhlun hlem­hletna theihtawpa do turin an inbuatsaih mek tih sawiin, "Hemi atana hmanraw hrang hrang - social security lama hmalakna te, ram leilung humhalh te, entrepreneurship leh skill development-te mumal taka kalpui tura inruahman a ni," a ti a, entrepreneurship development centre, incubation centre leh state up hub-ahte sorkar hmasain hma lo lain hawn a nih tawh thu a sawi.

Kum 2024-2025 budget a pharh zawh hian Chief Minister hian Assembly Annexe conference hall-ah thuthar thehdarhtute a kawm nghal a, adviser to CM (Finance) TBC Lalvenchhunga leh Finance dept. hotute'n an ṭawiawm.