Stojkoski Bobi - OUT; Sawmtea - IN : Tlai 4:30-ah Aizawl FC Vs Real Kashmir

Aizawl FC-in kuminah match li khel tawhin point hnih chiah an la hmu. Mizo club-in head coach Stojkoski Bobi chungah rinna an nghat ngam tawh lo a, assistant coach B. Malsawmzuala'n mawhphurhna a la dawn.

Mizo club hian vawiin tlai dar 4:30-ah Real Kashmir an mikhual dawn a, Sawmtea'n thuneihna a chelh nghal dawn. Mizo coach tan hmabak a harsa dawn a, Mizo mipui puihna an mamawh lehzual dawn. Aizawl FC hi nikum December 2 khan khualmualah Real Kashmir nen hian goal awm loin an inhnehtawk.

Thutlukna dik?

Aizawl FC-in coach B. Malsawmzuala hnuaiah result ṭha an nei a, amaherawhchu Mizo coach hian AFC A Licence a neih loh avangin head coach-ah dah theih a ni lo. Beiseina sang tak nen North Macedonia aṭangin Stojkoski Bobi an la lut.

Bobi hi sap pachal, ngaihdan bik nei leh head coach a nih anga mahni thu huai taka kalpui ṭhin a ni. Hei hi coach ziaa pawimawh tak ni mah se Mizo club enkawltu hian Mizo player a ring tawk lo.

North Macedonian coach hian Sawmtea hnuaia an khelh dan a thlak hlawk bakah an chet ṭhatna kawnga player ṭhenkhat rintawk loh a nei bawk. Bobi tana harsatna belhchhah turin club top scorer Lalrinzuala a inhliam a; foreinger lakluh tharte an ṭha tawk lo bawk.

Foreign coach hnuaiah Aizawl FC-in hmahruaitu Mohammedan SC an chelh a, result ṭha ni mah se an khelh dan erawh a ṭha lo. Mizo club hi khualmualah Delhi FC lakah an tlawm a, Sreenidi Deccan lakah 5-1 a an tlawm bakah Rajasthan FC nen goal awm loin an inhnehtawk.

Sawmtea hnuaiah Aizawl FC-in result ṭha an nei ngei ang, tih chiang lo mah se Mizo club tan Stojkoski Bobi ban hi thutlukna dikah a ngaih theih.

Beiseina thar chu

Aizawl FC hian Dutch manager Erol Akbay hoa bul ṭanin Mohammedan lakah tlawm nghal mah se Sawmtea hnuaiah palina ni chungin phase 1 an khar. Kumin match li khelh tawhah chak hmel la hmu loin point hnih chiah an hmuh avangin table-ah pariatnaah an awm tawh.

Mizo club tan champion beiseina a tawp hman a, mahse table chanve chunglama awm thei dinhmunah erawh an la ding. Aizawl FC hrechiangtu Sawmtea'n match hmasa berah starting elven a siksawi leh hret a nih pawhin a mak lo ang.

Aizawl FC leh Rajasthan FC inkhel hi Indian Football YouTube Channel leh Euro Sports-ah a en theih dawn a, Mizo club tana ṭha ber erawh a hmuna ṭawiawm a ni thung ang.