Santosh Trophy boruak a 'hot' chho

FIFA Santosh Trophy 2024-ah team tinin match hnih ṭheuh an la khel dawn a, tling tawh leh tla tawh an la awm lo. Vawiin hian group A team-te an inlan dawn a, Services-in chawhma dar 10:00-ah Assam an hmachahwn dawn.

Services hian match hmasa pahniha hnehna an chan hnuin an player pawimawh an dah ṭha a, Goa laka an tlawm leh tak si avangin tla thei an la ni. Assam hian match hnuhnung berah entu 13,000 chuang hmaah inelna thlengtu Arunachal Pradesh an hneh avangin inrintawkna nasa tak an nei ang.

Mizo tlangval Zothanpuia (Thangpuia) chuan, "Goa lakah player ṭhenkhat an hahdamtir a, kan khingpuite hian goal venhim hna an thawh leh si avangin kan chesual. Assam lakah chuan kan ṭhat dan berin kan khel leh tawh ang," tiin Vanglaini a hrilh - Thangpuia hi Services defender pawimawh a ni.

Chawhnu dar 2:30-ah Kerala leh Arunachal Pradesh an inkhel dawn a, inelna thlengtu hian point an hmu thei hrim hrim a nih chuan match hnuhnung bera Meghalaya leh Arunachal Pradesh inkhelh hunah Golden Jubilee Stadium khat ṭhap inkhel entu an pungkhawm thei ang.

Zanin dar 7:00-ah Meghalaya-in group hmahruaitu Goa an hmachhawn dawn. Nikum finalist Meghalaya-in result ṭha hlawhchhuah harsat mah se khelmualah erawh an khel a nung ṭhin. Goa lakah pawh Meghalaya hi attacking football khel tur zawkah a ngaih theih a, chutihrualin Goa hian counter attack hmanga vuaklet an thiam tih hriat a ṭha.