FA Cup Last 16 : Chelsea, Man United leh Liverpool inlan zan

Khawvela football inelna upa ber FA Cup last 16 chu zanin hian khelh chhunzawm a ni dawn. Zanin dar 1:00 hian Stamford Bridge-ah Chelsea-in Leeds United an mikhual dawn. Minute 15 hnuah Manchester United-in Nottingham Forest an tlawh dawn a, dar 1:30-ah Liverpool-in Southampton an mikhual bawk ang.

Club lian pathum an inlan dawn bakah Premier League club pahnih Wolves leh Brighton & Hove Albion te zanin dar 1:15-ah an inkhel dawn. Zanina inlan tur club pariat zinga club parukte hi Premier League club an ni a, club dang pahnih Leeds leh Southampton te hi Championship club ni mah se English football-a sulhnu nei ṭha tak an ni bawk.

Tho chhuak tur Blues

League Cup final-ah Chelsea an vanduai a, Liverpool laka an chance ṭhahnem tak goal-a an chantir theih loh avangin nomawi an chân. Mauricio Pochettino hote hi indawm kun hman an ni lo - zaninah Leeds an mikhual lehnghal dawn.

Chelsea tlarhmaa awm Cole Palmer, Raheem Sterling leh Nicolas Jackson ten goal khung an harsat a, bench aṭanga lut Mykhailo Mudryk, Noni Madueke leh Christopher Nkunku te pawhin an khung thei bik lo.

Mahse, Blues hian Reds lakah hian minute 90 chhungin goal an chhuah bik lo. Hemi hma chiah hian Premier League-ah champion lai Manchester City chu 1-1 in an chelh thei a, mahni muala Championship club laka tlawm tura dah an la harsa.

Chutihrualin Leeds hi Championship-ah pahnihnaah an awm mek a, season thara Premier League-a let thei dinhmunah an ding. Championship specialist tia chhal ngam Daniel Farke hnuaiah Leeds an vul mek a, league-ah phei chuan a zawnin vawi kua an chak zawn tawh.

Tlarhma player pathum Crysencio Summerville (16), Joël Piroe (11) leh Daniel James (10) ten goal 10 an khung tling ṭheuh tawh a, Chelsea tan fimkhur a ṭul ang.

United tan phuba

Man United hian nikum December 30 khan Nottingham Forest hi khualmualah 2-1 in an hneh tawh lo a, Erik ten Hag-a hote tan FA Cup hi phuba lakna remchang a ni ang.

Ten Hag-a hote hian chet ṭhat ṭum nei bawk mah se chet ṭhat zawn an harsat a, an chesual leh ṭhin. Kartawp inkhelah pawh an mualah Fulham 2-1 in an hneh lo a, Cottagers hmachhawn ṭuma khel lo Rasmus Hojlund chu zaninah pawh a la beiseiawm chuang lo.

Man United tan nomawi chawi turin FA Cup a pawimawh a, chutihrualin coach leh player-te tan Old Trafford-a cham chhunzawm turin khelh hmabaka chet ṭhat a pawimawh. Club neitu thar Sir Jim Ratcliffe leh a hoten Man United hi ṭhuah fai an tum a, tun nipuiah hian player engemaw zat chu chhuak tura ngaih an ni.

Zanin inkhel result hian player chauh ni loin Ten Hag-a hmalam hun thlengin nghawng a nei ang.

Quadruple champion

Liverpool-in player naupang chhawr chungin League Cup nomawi an chawi tawh a; inelna dang Europa League, Premier League leh FA Cup-ah an la champion thei vek. Tun season zawhah Jurgen Klopp-a chhuak dawn a, German manager thlah theih dan ropui ber chu quadruple champion a ni.

Klopp-a hote hian tun season-ah football nung ṭha tak an khel a, player naupang zawk an luh pawhin an che ṭha zel. League Cup champion bakah Premier League hmahruaitu an ni hian season ṭha tak an hmang tih chu a nemnghet a, chutihrualin season a la tawp lo.

Goalkeeper Alisson-a'n thla khat chhung a la khelh theih dawn loh avangin Caoimhin Kelleher chu first keeper-a chhal theih a ni rih a, Community Shield-ah chiah la inlan Adrian pawhin bul a ṭan thei bawk. Klopp-a'n Saints a hmachhawn hunah player a siksawi leh hret a nih pawhin a mak lo ang.

Southampton hian Championship-ah result an nei ṭha ringawt lo a, game mawi an khel tel. Chutihrualin an khelhna tur Anfield a nih dawn avangin Saints tan game mawi leh ṭha khelh a har dawn a; Championship lama che ṭha Adam Armstrong leh Che Adams te tan fiahna a ni thei ang.