Khelo India: University zinga football thiam ber University of Calicut

Khelo India University Games 2023 Mipa Football chu vawiin tlai khan khelh zawh a ni a, University of Calicut chuan University of Kerala chu 2-1 a hnehin an champion.

Khelo India University Games Mipa Football kharna huna khuallian sports minister Lalnghinglova Hmar chuan, tunlaiah chuan football chu infiamna chauh a ni tawh lo a, eizawnna ṭha a ni tel tawh tih a sawi a. University Football inelna ni mah se a beisei leh rin phak bakin player an ṭhain an inkhel a hmuhnawm tih a sawi bawk.

Lalnghinglova Hmar chuan Mizoram pawn aṭanga mikhual lo kal zawng zawngte chu engtik niah emaw Mizorama lo zin leh ngei turin a sawm a, ṭhenkhat chu football khel tur leh ṭhenkhat chu khualzin angin Mizoram state nuam tak tlawh leh vek turin a sawm bawk.

Khelo India University Games Mipa Football-ah hian University pariat an inlan a, Group pahnihah ṭhen hran niin an inkhelh kual vek hnuah, group pahniha a sang pahnihten semifinal khelin chumi hnuah final khelh leh a ni.

Khelo India University Games 2023 hi India hmarchhak state ten an inthlen ṭawm a, Assam chu a thlengtu pui ber niin state dangten inelna pakhat ṭheuh an thleng - Mizoram hian Mipa Football bik a thleng a. Manipur erawh an state a buai avangin Khelo India hi an thleng ve thei lo a ni.