Hneh loh la tawng lo Manipur

FIFA Santosh Trophy 2024-ah Manipur-in hneh loh an la tawng lo a, group B hmahruaitu ni turin February 26, Thawhṭanni khan champion lai Karnataka chu 1-0 in an hneh. Manipur hian match thum khelh tawh aṭangin point sarih an hmu a; February 29, Ningani chawhma dar 10:00-ah Mizoram nen an inkhel ang.

Golden Jubilee Stadium-a Karnataka leh Manipur inkhelh ṭuma team pahnih danglamna chu penalty a ni a, Manipur hian second half ṭan chiahah corner kick an hmu. Karnataka player Godwin Fernandes-a'n a chhehvel en loin ball petchhuah a tum a, Manipur winger Leimajam a pet avangin penalty a chawi. Minute 50-naah Ngangbam Pacha Singh rawn pen chhuakin penalty kick aṭangin goal awmchhun a khung.

Manipur hian match thum khelh aṭangin point sarih an hmu tawh a, tlak thei dan la awm bawk mah se quarterfinal lut turin an dinhmun a ṭha hle. Thangjam Saran Singh hote hian group stage-ah an khingpui hneh vekin final round an lut a, National Games-ah final an luh phak leh bawk avangin tun ṭumah pawh hian inrintawkna an nei sang hle.