Moyes-a phurrit chhawktu Jarrod Bowen

Jarrod Bowen-a'n a vawi khat nan hattrick a siam a, sulhnu hriatreng tawh tur a hnutchhiah zanah hian West Ham United chuan an mikhual Brentford chu 4-2 a hnehin point thum an hlawh chhuak.

Tun hnaiah David Moyes-a naute hian result ṭha an nei ngai meuh lo, coach Moyes hi bang mai tura duhtute thawm pawh a ring chho hle. Tunah erawh Bowen-a zarah boruak sang zualpui pawh a reh leh rih tura beisei a ni.

Bowen langsar

Thawhṭanni zan London Stadium-a Premier League inkhelah Bowen a inlar hma hle, minute ngana lekah a ball hmuh chu pet nuam tawk tur velin a dang sawt (ting) a, ball per leh hi chiang zetin goal-ah a hlap lut.

Goal luh aṭanga minute hnih lekah Bowen bawk kan hmu - English forward hian Vladimir Coufal-a ball pek chu laklawh nei miah loin a lo pet lut a, minute 10 an khelh tlin hmain chak zawk tur a chiang der tawhin a lang.

Mikhual Brentford tan Neal Maupay-a'n angle zim tak aṭanga khungin Bees beiseina a siam thar a, mahse second half-ah Bowen bawkin hnai tak aṭanga tauh lutin an goal thumna a khung - awmna tur hmun a thlang dik hle.

Hammers goal lina hi Emerson-a'n box pawn aṭanga goal kila a thlawh luh a ni a, goal mawi tak a ni. Hun tawp dawna Yoane Wissa-a goal pawh mawi viau mah se awmzia a nei phak tawh lo thung a, mualpho a hliah phak lo.

Moyes a him?

Inkhelh banah chanchinbu mite chuan West Ham manager David Moyes chu a hma hun an zawt nghal. Moyes chuan, "Tun season tawp hmain season thara ka awmdan tur chu ka tichiang ang, tunah chuan chhuah tumna erawh ka nei lo.

"Media lam hian min zawt nasa a, boruak pawh an vawrh vir kual viau. Tunah chuan he hmunah hian ka hlim a, club thuneitute pawh ka chungah an ṭha em em vek, chuvangin khaw dang ka hawi thei rih lo - season tawpah a chiang ang," a ti.

Season hmasa khan Moyes-a enkawl West Ham hian Europa Conference League title an la, kum 43 teh meuh an nghah hnuah major title an la leh chiah a ni a, tun season-ah duhthusam angin che rih lo mah se a sulhnu hi theihnghilh nghal mai chi a ni lo.

Premier League match 26 aṭangin West Ham hian point 39 an hmu a, table-ah pariatna an ni mek - European football khel phak china awm Brighton an phak lohna chu point khat chauh a ni a, ṭha leh sang takah season an la khar thei tih a chiang.