MSL9 : TBL hnehtu Bungkawn LB

Mizoram Super League (MSL) champion lai Khatla TBL chuan tun season chhunga a vawi hnih nan ngam loh an tawng. Thawhṭanni zan inkhelah Bungkawn LB Associates chuan TBL hi 79-77 in an hneh, an inthlauhna hi point hnih chauh a ni.

R. Dengṭhuama Indoor Stadium, Mualpuia inkhelah Bungkawn LB tan Gregory Lee Heckstall chuan point 54 tehmeuh a nei a, tualchhung player zinga amah hnaih bertu Lalremruata'n point 10 nei ve bawkin an team an chakpui.

Bungkawn hi vawi li an chak tling ta chiah a, champion lai TBL nen khelh zat inangah an chak zat a inang. An league match hnuhnung ber atan Bungkawn hian zaninah Champhai BC an hmachhawn leh ang.

Khatla TBL tan mimala cheṭha fal an awm lo. Moses Lalmuanzova (16 points), Lalliansanga (14) leh Vanlalṭhazuala (10) te khel ṭha pangngai mah se chak nan a tawk zo lo - TBL hian zanin dar 8:00-ah tun season bika chak la nei lo Venghnuai VR4 an tum leh dawn a ni.

Thawhṭanni zan inkhel dangah Champhai Basketball chuan Mission Veng Hotshots chu 80-77 in an hneh a, match ruk aṭanga vawi li hnehna changin team pariat inel zingah palina dinhmun an luah.

Champhai hi Aizawl pawn aṭanga Mizoram Super League khel awmchhun an ni, an inlan hmasakah beisei phak chiah lo mah se kuminah nasa takin hma an sawn. Anmahni ang thoa vawi li chak Bungkawn an hneh thei a nih ngat chuan semifinal-ah pawh hmachhawn châkawm lo tak an ni ang.

MSL9-ah hian team pariat an inel, league round-ah vawi khat ṭheuh an inkhel kual dawn, match khelh tur pakhat ṭheuh an la nei tihna a ni. Ruahman dan chuan March 1, Inrinni aṭangin a sang zual paliten semifinal game 1 an khel ṭan ang.