Roma chakna Paulo Dybala

Paulo Dybala chuan AS Roma a zawm hnua a vawi khat nan hattrick a siam a, a team hi Torino lakah 3-2 in hnehna a chanpui - Roma hian season thara Champions League khel phak turin beiseina an nei thar zel a ni.

Thawhṭanni zan Stadio Olimpico-a Serie A inkhelah Dybala hian chawlhlawk hma minute thum chauh awm tawhah penalty aṭangin goal hmasa ber a khung - mikhual lamin Duvan Zapata-a tauh luh hmangin an sut ve leh nghal.

Minute 57-naah Dybala bawk kan hmu - Argentina international hian mawi takin an goal hnihna a khung a, minute 12 a liam hnuah a goal thumna a khung leh bawk - goal hnuhnung ber a khung theih nan substitute Romelu Lukaku-a'n a thawhhlawk hle.

Hun tawp dawn lamah Dean Huijsen chuan anmahni lamah a tilut palh a, inkhel tawp lam boruak tinung thar leh deuh mah se Roma an buai duh tawh lo, an phu ang ngeiin point thum an hlawh chhuak.

Dybala hian hattrick hrim hrim hi vawi sarih a siamna a ni, a siam hnuhnung zawk chu kum 2018 Champions League daih tawh kha niin, khatih lai chuan Juventus player a la ni - tunah Roma tan sulhnu a hnutchhiah leh ta chiah.

Roma coach Daniele De Rossi chuan, "Player ṭha leh danglam, mi tam takin an tih ve theih ngai loh tur titheitu chu a takin kan hmu leh ta. Paulo-te theihna ang hi chu rinhlelh tur a awm lo.

"Kar laihawlah match hautak kan khel a, chumi hnuah Serie A match khelh leh nghal hi chu a hautak thei hle, chutiang chunga hnehna kan chang thei hi a lawmawm takzet a ni," tiin a sawi.

Jose Mourinho thlaktu Rossi-a naute hian Europa League-ah Feyenoord hnehin last 16 an inhlangkai. Season an hman ṭhat loh avangin Roma hian an manager hmasa an ban hial a, coach thar Rossi an neih chinah erawh an insiamṭha chho ta hle.

Italian manager hian Roma a enkawl tir lam match pathumah hnehna an chang vek, mahse Serie A hmahruaitu Inter Milan lakah 4-2 in an tlawm. Inter an ngam loh hnuah erawh a zawnin league match pahnihah hnehna an chang leh ta.

Rossi chuan, "Goal kan neih aṭanga rei lote hnuah min rawn chhanglet nghal a, keini lamin remchang kan neih ka chhawr leh mai si lo. A nihna takah chuan goal kan khung belh mai loh avang khan kan tuar hman ṭep, a tawpah erawh team leh player ṭha danglamna a lang," a ti.

Roma hian league match 26 aṭanga point 44 hmuin table-ah parukna an ni mek - UCL khel phak china awm Bologna chu khelh zat inangah point liin an phak lo mek, match khelh hmabak an la ngah avangin an tan kawng a la inhawng zau.

Thawhṭanni zan Serie A inkhel dangah Fiorentina chuan si an phurh hmasak hnuah Lazio chu 2-1 in an lehthal. Luis Alberto-a goal hmahruai khung chu mualneitu lamin Michael Kayode leh Giacomo Bonaventura te hmangin an chhanglet.

Lazio coach Maurizio Sarri chuan, "Hma kan hruai ngei mai, mahse hmahruaitu khelh dan tur angin kan khel chhunzawm lo. Chak thei dinhmuna din hnua kan thamral leh a nih chuan kan rilru put hmang a dik tawk lo tihna a ni.

"Chutihrualin player ṭhenkhat damlohna vanga khel thei lo an awm, ṭhenkhat chu training nei mumal thei lo an ni bawk. Hliam dam hlim leh damkawr te kan chhawr a ngai, chuvangin rilru put hmang dik nghal vek erawh a harsa," tiin a sawi.