Red Bull umphak a harsa dawn - Hamilton

Formula 1 season thar chu tun kartawpah tlan ṭan a ni tawh dawn, world champion vawi sarih ni tawh Lewis Hamilton chuan a elpui tur a chhaih ṭan leh ta - champion lai Max Verstappen leh Red Bull chu rin kai ber an nih thu a sawi.

Red Bull leh Max Verstappen hian season hmasa kha an awp hneh hle a, midang tan remchang an siam ve miah lo tluk a ni. Driver leh team championship lamah anmahni elphak an awm lo.

Dutch tlangval Verstappen-a'n vawi 19 ngawt hnehna changin chak tam record a siam a, a teammate Sergio Perez chu vawi hnih a chak ve thung - kuminah pawh rinkai an ni leh dawn.

Mercedes tana season hnuhnung ber hmang tur Hamilton chuan, "Ka hmuh dan chuan Red Bull hi midang chungah an awm rih a, chu chu midang pawhin min pawmpui ka ring, tunah chuan team ṭha an ni.

"An ṭhat avang hian midang tan champion theih loh a ni tihna erawh a ni chuang lo," a ti. Hamilton hi world champion vawi sarih ngawt a ni tawh a, a la duhtawk lo - tun season zawh hunah Ferrari a la zawm leh ang.

McLaren team principal Andrea Stella pawhin season thar lo awm tur thlirlawkin, "Team tin maiin hmasawn tumin theihtawp kan chhuah vek a, hun rei lote hnuah eng ang takin nge kan ṭhat tih chu hmuh theih a ni dawn," a ti.

Ferrari driver Charles Leclerc leh Mercedes driver George Russell te pawhin Red Bull an dahsan thu an sawi. An elpui team an fak chiam a, an rilru tak tak an sawi nge an chhaih tih hriatthiam a harsa, ṭawngkam hmangin inelna an ṭan tih erawh a chiang.

Car intlansiakna sang ber season tharah hian intlansiak vawi 24 awm tura ruahman a ni a, a tam ber ṭum a ni ang. Inelna hmasa ber atan March 2, Pathianni hian Bahrain Grand Prix an tlan ang.