Harsa takin Murray a chak

Andy Murray chuan set a hloh hmasak hnuah Denis Shapovalov a hneh let. Thawhṭanni zan khan Britain tlangval hian harsa takin Dubai Tennis Championship khelh laiah second round a inhlangkai.

World number 1 hlui Murray hi tun hnaiah a khel fuh hleithei lo, kar hmasa khan Doha lamah a tlawm leh a vangin a zawna vawi ruk chak lo chungin Dubai Championship hi a khel, mahse 4-6, 7-6 (7/5), 6-3 in hnehna a chang.

Grand Slam vawi thum champion tawh Murray chuan, "Ka ngainat leh hmangaih tak mai tennis khel tur hian hun rei tak ka nei tawh lo tih ka hria, amaherawhchu ka hun neih ang chhun chhun hi nuam leh ṭha taka hman ka duh.

"Tournament khelh hi nuam ka la ti reng a, chona hmachhawnte hi nuam ka tih zawng a la ni reng. Inkhelh nuam ka tih loh hun chu tennis ka chawlhsan hun a ni mai ang," tiin chawlh mai a la tum lo, beisei erawh a nei sang ngam tawh lo thung.

Murray hian hard court bikah match 500 hnehna a chang tling ta chiah a, player ropui Roger Federer, Rafael Nadal, Novak Djokovic leh Andre Agassi te huangah a hming a ziak lut ve leh ta chiah bawk.

Britain tlangval Murray chuan, "Hard court bika vawi 500 chak tlin chu sulhnu ṭha tak a ni, ka tan chuan inkhelhna hmun nuam leh ṭha a ni," a ti a, inkhelh nuam a tihna ber hmun erawh grass court a ni thung.

Murray hian Wimbledon bakah US Open nomawi a chawi. Hrad court inelna lian Australian Open pawh final vawi nga ngawt a lut, mahse a vanduai zawkah a ṭang zel - player ropui bikte nen an vanglai a inrual miau avangin a tan nomawi lian chawi hnem a harsa.