East Bengal an insiam ṭha nghal

An coach hlui Khalid Jamil-a team enkawl Jamshedpur FC an ngam loh hnuah East Bengal an insiamṭha nghal a, Thawhṭanni zan khan an mikhual Chennaiyin chu 1-0 in an hneh. Kolkata club tan Nandhakumar Sekar chuan minute 65-naah inkhela goal awmchhun a khung a, Chennaiyin lamin a chhanletna tur an neih loh avangin an tlawm.

East Bengal-in hnehna an chan avangin playoff khelh an beiseina a la thi lo. ISL-ah hian table-a pakhatna leh pahnihna chu playoff semifinal khel turin an tling a, pathumna aṭanga parukna chinin playoff knockout an khel dawn bawk - East Bengal hi pariatna an ni mek a, parukna Jamshedpur chu point hnihin phak lo mah se, match khatin an khel tlem zawk a ni.

Chennaiyin lakah hian Jamshedpur laka bench aṭanga luhtir Lalchungnunga chuan East Bengal tan inkhel bul a ṭan ve leh ta a, Durtlang tlangval hoin Kolkata club tlarhnungten goal an chhuah lo.