Girona-in Real an um zel

Tun season La Liga-a beisei phak baka khel Girona-in hmahruaitu Real Madrid thlahfal lutuk an tum lo a, Thawhṭanni zan khan league match inkhelah Rayo Vallecano chu 3-0 in an hneh.

Girona tan Viktor Tsygankov chuan minute 52-naah goal hmahruai khungin, minute 76-naah Rayo left back Pep Chavarría chu a yellow card pahnihna avangin hnawhchhuah zui a ni a, Girona tan hna a awlsam tawh.

Brazilian winger Sávio chuan hun pek belhah goal hnih khung zuiin, 3-0 ngawtin Girona an chak a, July thlaa Manchester City zawm tur Savio hian tun season-ah Girona tan inelna hrang hrangah match 30 khelin goal kua a khung tawh a, assist vawi sarih a nei bawk.

Girona manager Míchel chuan, "Scoreline hian inkhel a hrilhfiah tawk lo a, kan inhnehtawk hle. Chutihrual chuan pahnihna dinhmun kan luah leh tak avangin ka lawm a, La Liga-a goal khung hnem ber kan ni leh ta bawk - season tawp thleng ṭan mar pat kan tum ang," a ti.

La Liga-ah Real Madrid chu hmahruaitu ni mekin, khelh zat inangah Girona hian point rukin an phak lo mek a, pathumna Barcelona aiin point hnihin an sang zawk - league-ah goal 57 khung tawhin, anni aia khung hnem an awm lo.